السبت , مايو 30 2020

الرئيسية / إسهامات القراء / هشام خليل يكتب ….الأحقيه التاريخيه لجزيره تيران و سنافير مصريه ميه في الميه،

هشام خليل يكتب ….الأحقيه التاريخيه لجزيره تيران و سنافير مصريه ميه في الميه،

  • فيه جزيره إسمها جزيره برخيل بالأسباني، و بالعربي اسمها جزر توره،. الجزيره دي مساحتها ٠،١٥ كم مربع و غير مأهوله بالسكان. الجزيره دي بتبعد عن المغرب ٢٥٠ متر (الرقم صح ٢٥٠ متر)، و بتبعد عن أسبانيا حوالي ٢٠ كم.
  • كل القوانين بتاعه تقسيم الحدود البحريه بتدي ملكيه و سياده الجزيره دي للمغرب بشكل قاطع، لكن الجزيره دي أسبانيه بحكم الأحقيه التاريخيه. و سنه ٢٠٠٢ المغرب بعتت كام عسكري و حطو العلم المغربي علي الجزيره علشان يراقبو المهربين، قوم إيه، تقوم مظاهرات في اسبانيا، و تبعت اسبانيا فرقه صاعقه محميه بالطائرات تنزل علي الحزيره و تأسر العساكر المغاربه، و تحط العلم الأسباني علي الجزيره ، و تطلق سراح المغاربه في نفس اليوم في رساله إن الجزيره أحقيه اسبانيه بحكم الأحقيه التاريخيه، و نفس الكلام علي جزر أشفارن اللي بتبعد عن المغرب ٤ كم و بتبعد عن اسبانيا ١٤ كم. و مئات الأمثله الأخري !!
  • الأحقيه التاريخيه بقه لجزيره تيران و سنافير مصريه ميه في الميه، لسبب بسيط إن ما يطلق عليه الدوله السعوديه الأولي و الدوله السعوديه التانيه بين سنه ١٨١٨ و ١٨٩١ مكانش ليها حدود علي البحر الأحمر اساسا، و الدوله السعوديه التالته بين ١٩٠٢ الي قيام دوله المملكه العربيه السعوديه سنه ١٩٣٢ برضو مكانش ليها حدود علي البحر الأحمر، و حتي بعد كده و لو فرضنا صحه إدعاء السعوديه إن الجزر بتاعتهم برضو فضلت السياده مصريه، و حاربنا عليهم ٣ حروب ، و مات شهداء بسببهم، و إدفن عليهم ٣٣ من خيره شباب بلدك من فرقه الصاعقه اللي دافعوا عن جزيره تيران لأخر رصاصه في حرب ٦٧. غير لو عايز تعتبر شهداءك مرتزقه إستشهدو فطيس دفاعا عن أرض سعوديه !!
  • أي شخص عاقل و عنده ذره إنتماء علي أقل تقدير يطالب بتحكيم دولي لفض الإشتباك بين الإحقيه التاريخيه و قوانين تقسيم الحدود و المياه الإقليميه، بلاش تدافع عن حق بلادك التاريخي يا سيدي، أطلب تحكيم علشان تتأكد، أطلب إستفتاء إحتراما للدستور اللي رقصت قدام لجانه، لكن التسليم بإتفاق يتعمل بالليل و تصحي تقراه في الجرايد، و تدافع عنه بالروح بالدم هو ده مش قادر استوعبه الصراحه !!
  • أنا فاهم إن فيه ناس بتدافع و خلاص علشان ميطلعش السيسي غلطان أو باع الأرض، لكن يا سيدي المفروض الأولي إنك تدافع عن بلدك و تراب بلدك، الرؤساء زائلون و البلد هي اللي باقيه !!
 
 
 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: