ثقافة وفنون

قولوا لأم الشهيد….شعر مني غنيم

موجوعة يامه و بتتألمي
عارفه احساسك من غير ما تتكلمي
الدنيا في عيونك بقت ضلمه
و النوم لجفونك ما قرب لحظة
بتتمني لو يرجع و يضمك ضمة
عارفه يامه و بيكي حاسه
و الوجع اللي قاتلك بيقتلني
لكن منه أنا فاكره
همسه قالها قبل ما يمشي
بلادي يا أختي زي أمي
روحي عشانها ما تغلا
و لو في يوم ترابها حضني
أسعد كأني في حضن أمي
خليكي يا أختي لكلامي فاكره
و أمسحي بيه دمع أمي
و قوللها إبنك في الجنه
عريس يامه ولا انتي ناسيه
قيمة الشهيد عند ربه
إمسحي دموعك و يلا نفرح
و نقيم لحبيبك أحلى زفة
دا الورد عشانه يامه فتح
و زهر الرمان بيضحك
حتى البنفسج نسي حزنه
و ضم الياسمين في حضنه
و من الزيتون سامعه ضحكة
و زقزقة العصافير على اغصانها
يلا قومي نزفه مع الملايكه
دا إبنك شهيدك يامه حي
و في حضن الحور ح يتهني
يلا تعالي و اسمعي
في الجامع الشيخ بيدن
و جرس الكنيسة معاه بيرن
حتى الشمس لسه طالعه
و الهوا كأنه نسمه
يلا يامه
الزفه رايحه بيه
ع الجنة

أخبـــار ذات صلـــة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق