الرئيسية / ثقافة وفنون / رشا الفوال ….شعر مصباح المهدي

رشا الفوال ….شعر مصباح المهدي

(كملي لي قصيدة تبدأ
بابتدا/ أوشك/ كأنه
جي بعد الوقفة عيد)
بكره ضي بعيد ببالنا
عطرة فايت من قبالنا
بكره طالع
من شقوق الحزن
والصدر الشراقي
بكره (شاقق غيمة)
ممكن ييجي دمعة
بس جيّ
يارشا الفوال نعدّي
من خروم الحيرة ضيّ
مااخترعناش ابتسامة فوتوشوب
تحتمل لسعة برودة
هوبّا هوب
بيها ننفد م الكمين
بيها نضحك
ع البشر دول أجمعين
بكره توهه في خبوت
مالهاش نهاية
خططت للحزن من ضربة بداية
م الميلاد
من هنا ليوم المعاد
كل واحد فينا دولة
همه هم يكفي دولة
عيشته م المبدأ محاولة
أمموها الكدّابين
أمموها لصوص طريق
سمى أخ / حبيب/ صديق
وابتدا يصدق رموه
باتهامات أمن دولة
باتهامات شيخ بدقن
باتهامات حد رامي
علّته على حد تاني
واحنا أواق م الشجر
سقطت خلاص
كل واحد فينا قشّة
في عرض بحر
كل واحد فينا بحر
بيخترع سكّة خلاص
والمرض في التوهه لص
وابتسامات مالها معنى
ع الوشوش اللصة لص
يا رشا الفوال تعدّي
من خروم البال تبص
ٱخر الممشى ابتسامة
عارفة تعمل إيه ف مين
قادرة تعمي عيون كمين
عن فرحنا_ الطفل_ شاب
مهما قالوا شاخ وشاب
يا رشا الفوال شباب
معمدانيات جراحنا
نور على ناصية طريق
نور نهار طالع أكيد
من دهاليزنا البعيدة
من تحدّينا الحديد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *