الرئيسية / فيس وتويتر / سمير زين العابدين يكتب ….شالوا الحكومة, جابوا الحكومة طلع اللي في جيبك وانت ساكت.

سمير زين العابدين يكتب ….شالوا الحكومة, جابوا الحكومة طلع اللي في جيبك وانت ساكت.

الحكومات المصرية عندها جدول رخم اسمه الميزانية مافيش اي حكومة عارفة تظبطه.
خانة المصروفات مليانة مطالب, كلها مطالب مشروعة عدا كام بند كده دمهم تقيل ومالهومش لزوم زي التعليم والصحة والدعم.
وخانة الإيرادات مش مكفية, بس الحقيقة الكل عامل اللي عليه, عدا المواطنين الرخمة مابيدفعوش كفاية وطلباتهم سخيفة.
المصيبة العالم اللي ما بتفهمش وتفتي فيها, وتقولك في مصادر كتيرة الحكومة ناسياها, زي تقليل الإنفاق البذخي الحكومي ومرتبات المستشارين, ومخصصات مجلس النواب والأزهر, والضرائب التصاعدية والتركيز علي زيادة الانتاج والتصدير بدلا من الانشاء والتعمير اللي ما بتجيبش موارد, وايقاف الاستدانة اللي واكله اكتر من ثلث الميزانية, والقضاء علي الفساد والجشع والاحتكار اللي بيزود الأعباء والأسعار, والإستغلال الأنسب للموارد الطبيعية المنهوبة, …. الخ.
كله كلام فارغ من ناس مش دارسة الكلام ده ولا بتفهم زي الحكومة ما بتفهم.
ما يعرفوش ان في الف سبب وسبب يعوق مقترحاتهم السخيفة, وان الواجب عليهم انهم يتكتموا ويسمعوا واحد بس وما يتكلموش في الكلام ده تاني ومش مصدقين اننا بقينا دولة فقيرة جدا وبتتعرض لمؤامرات كونية وان الحكومة بتعمل اللي عليها وزيادة بس الشعب ما بيعملش اللي عليه.
طلع اللي في جيبك أو حتي روح استلف وانت ساكت علشان عايزين نظبط الجدول.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *