الرئيسية / كتاب وشعراء / إنت كافر بالقيامه …….شعر محمد أبو نعمه

إنت كافر بالقيامه …….شعر محمد أبو نعمه

إنت كافر بالقيامه ..
مش بتؤمن بالمسيح ..
وانت لو رايح كنيسه ..
مش بعيد دمك يسيح ..
وانت إنجيلك محرف ..
وانت قرآنك تطرف ..
جاي بدم وحد سيف ..
وانت شيعي من الروافض ..
وانت سني بس رافض ..
تتبعني بدون نزيف ..
وانت بتروج لداعش ..
وانت إخوان مسلمين ..
وانت مش لازم تناقش ..
اللى اقوله تقول آمين ..
العباده شيء يا ساده ..
نازله لينا أجمعين ..
ربنا وحده اللى عنده ..
صحة الخبر اليقين ..
سيبني منك .. وانت سيبك ..
كل واحد وبإيمانه ..
ربنا لو كان عايزنا ..
مله واحده كان زمانه ..
مشّى كلهُ م البدايه ..
ع الصراط المستقيم ..
فـ انت آمن باللى عايزه ..
بس فكر ..
الحكايه مش ديانه ..
الحكايه بجد أكبر ..
المخطط جاي مقاسنا ..
واحنا ياما لبسنا فيه ..
واللى حامي الوضع واقف ..
من بعيد يضحك عليه …
عندي مره وانت عندك ..
مره تانيه ومنها فيها ..
هيا عادته يعني ولا ..
م الصهاينه هيشتريها ..؟
عصفورين وبضربه واحده ..
عندي شر وعنده عيد ..
اللى تحت الأرض فاير ..
واللى باشا مستفيد ..
اللى مات هنقول شهيد ..
وانت نام على أي جنب ..
واللى جاي فى الرجل عمرهُ ..
ما ارتكب غير دينهُ ذنب ..
الخلاصه هيا كفه ..
والجميع مرصوص عرايس ..
هنلاقيها م المخالفه ؟
ولا من سعر القرايص ..!؟
الشهاده حق واجب ..
لاجل وطنك لو تموت ..
والخطاب ابو دم بارد ..
دمه أتقل م السكوت ..!!
الحقيقه الوضع يكسف ..
والسكوت قلة أدب ..
اللى مش طايل سعادتهُ ..
برضهُ ممنوع م الغضب ..
والسبب مش كام معايره ..
أو خلاف بين أمه ثايره ..
فتش الدايره اللى دايره ..
وانت هتشوف السبب …!!

تعليق واحد

  1. ماشاء الله مش جديده ع ابو نعمه والله ربنا يزيدك من فضله يارب يا صديقي ودايما ناجح 👌❤❤

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *