الثلاثاء , يناير 22 2019
الرئيسية / كتاب وشعراء / مرحبا…….شعر فيروز حبابه

مرحبا…….شعر فيروز حبابه

حسيت لو كتبت هالزفرات باللغة الفصحى
إني عم اتملق للمعاناة
و أتأنق قدام موضوع مجعلك الطبعة
متل مكياج بواجب تعزية
حسيت ممكن يصير “الحرف خدعة”

“يا شعب الصبر العظيم”

صعب بل القلم بمحابر الألم ورسم الحزن ع بياض
مسجى بالخيبة مكفن باللوعة
خبر ورا خبر
فزعة ورا فزعة
شي من باب الأسى
شي من باب الضحك ع شر البلية
شي من هول السرعة
بس للسوريين دخول غينيس
لأنهن بلا خدود عم يتلقوا الصفعة
و صفعة تجر صفعة
بعلمك آخر همك تداعيات الحرب
دفن المآسي بلا تشييع مستعجلين الرجعة
بعلمك غلا الأسعار قاعد مستنيك ليسحب قرعة
اختاروك أصلب قلب بيتحمل الأزمات
دونوا اسمك بخط الرقعة
-رجعت الشتوية..
(مشتاااقة مشتااااقة يا رمانة
للدودة ال فيها دالة)
و حرمت حتى ع الدود طلعة
إنه من كل العجاف بسنين الرخاء
كان أقصى همنا صلاة استسقاء
هلئ ب هالقل
أقصى همنا استبقاء على قيد الجمعة
عواصف عم تعرض مفاتنها
ع شعب بيعتبرها منتهية ما بياكله للهم
بيمزح و بيخترع نكت من صميم الدمعة
غاز ما في
مازوت ما في
كهربا ما في
زيادة راتب ما في
انخفاض اسعار مافي
حليب اطفال ما في
يحرئ حريشكم منين هالأطفال و حالكن عالقرعة
مستمرة الحياة اوعكن تفكروا انها بتستحي
او بيصيبها خجل من حسراتكن مجتمعة
اوعكن هه
ترى هيك بتبلشوا تغلطوا و الغلط ممنوع و العتب مرفوع
انتوا اكبر من هيك يا أهل السمعة
اتحلوا بالروح الرياضية و اعتبروا الرياضة متعة
لهيك حطوا كل آمالكن او بقايا آمالكن..
لك الأنكى إنها ما بتخلص آمالكن!بتتكاثر بطبعها
حطوها بالطابة
غيروا جو لو ساعة بالجمعة
يا ويلاااااااخ ع هالصرعة!
فجعتونا بأصدق نزعة!
خليتونا ننسى بي البرد و أم الجوع و ولاد السبعة
السبعة و ذمتها موضة عصرية
لبين ما تخمد ناركن شوية
بركدن شي فجر يصفي النية
خدولكن ه ال كم صاروخ دفعة
ارجعوا لأول القضية
كل شوية بنفوتكم بقصة بنطلعكن من وقعة
و فوق هاد و كله
فوق هاد و كله
مطلوب منكن كلكم
“كلكن يعني كلكن”
ال بيعرف القبلة يصلي
ال ما بيعرف يشعل شمعة..

سوريين نحنا يا زمن سوريين
مو بدعة !

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *