الثلاثاء , أبريل 23 2019
الرئيسية / كتاب وشعراء / هيَّ اللي فضلت وحدها …….شعر أحمد الخدرجي

هيَّ اللي فضلت وحدها …….شعر أحمد الخدرجي

هيَّ اللي فضلت وحدها ..
هيَّ اللي فضلت و الشوارع رَوَّحِت
نزلت من الليل والغُنا ف قلب الميدان
وردة غرام محدوفه بِكر 
على كل واد متعشقه ف أحضانُه بت
قالت صباح الخير غُنا
رديت .. صباح النور يا ست
……
وانا كنت ماشي ف الجحيم وباقول
غنوة ابتديتها لبنت لسه بتول
عدت قُصادي أول امبارح
لخبطني صوتها ولخبطت فِيَّا الفصول
( وياليل ينوبك ثواب )
لو شُفتها ماشيه ..
لو بس عدت يعني وانا غايب
خليها ع الكورنيش على أحلى ترابيزه
جهزلها قهوتك \ شايك \ وأحلامَك
غنيلها حاجه ل ” طِلِب ”
ماهي أصلها بتعشقُه
غني ( في قلبي غرام \ مصبرني \ على خصامَك )
ما هي أصلها هِيَّ
هيَّ اللي فضلت بس ..
هيَّ اللي فضلت و الأغاني اتحَرَّفِت
والشعر
والروايات
و روح كُتب التاريخ
والقلب لولا استأذِنِت واتكومت ف الروح
فاتظبَطِت التواريخ
……………
مش قصدي أي قلوب بالبهجة بيحسوا
أنا قصدي قلبي أنا والعُهده ع الراوي
قلبي اللي كان مليان بنات فالصو
…………..
هي اللي فضلت والليالي استسلمت
للبياعين
والمومسات
ورياح بتبعت برفانات
بالصُدفه على كل البيوت
بتهز براويز الصور والذكريات
ورق النتيجه فجأه بيفِر لورا
وبتتولد ف الليل حاجات ..
حكايات قديمة
أبيض و إسود كلها وبتنتهي
وهي اللي تفضل وحدها
منديل ونس .. لدموعي أوقات الهزيمة

تعليق واحد

  1. وهي اللي تفضل وحدها
    منديل ونس.. لدموعي أوقات الهزيمة🎈
    الشعر الحقيقي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: