الثلاثاء , أبريل 23 2019
الرئيسية / ثقافة وفنون / رؤية نفسية عن بعض شخصيات مسلسل تحت السيطرة.. بقلم/ منى ياسين

رؤية نفسية عن بعض شخصيات مسلسل تحت السيطرة.. بقلم/ منى ياسين

زوجة طارق في مسلسل تحت السيطرة
لما عرفت انه رجع تاني للمخدرات وقتها جمعت التحف والأجهزة لأنها عارفة انه هيبدأ يبعهم قطعة قطعة علشان مزاجه
هو أقسم لها أنه مش هيرجع تاني وانها فاهمة غلط وان الموضوع مش زي ماهي متصورة
لكن مع الوقت شكها بقى يقين وقتها قررت تعمل اجهاض لحمل كانت مأجلاه سنين وخايفة من اللحظة اللي زوجها المتعافى يرجع تاني
احساسها ماكذبش ورجع تاني وواجهته وضربها وطلبت الطلاق
وهو راح سرق دهب أمه واتسبب ان اخوه يبقى مدمن ومات قدامه وهو بيضرب
وكلامها القاسي ليه “روح موت يا طارق، أنت ربنا مسلط عليك نفسك، انت هتفضل كده لا عايش ولا ميت…..
الزوجة هنا حتى بعد الطلاق كانت بتعترف قدام روحها انها لسه بتحبه حتى لو مش هينفع ترجعله أو تعيش معاه.
هنا هي كانت عارفة قبل الجواز انه مدمن وقررت تتحدى وتتجوزه لإنها كانت بتحبه..
كانت بتحبه بجد لكن للأسف ده ماكنش حافز قوي له علشان يفضل متعافى ويثبت لروحه قدامها إنه راجل.

أما (علي) في المسلسل
شاب في مقتبل العمر والمستقبل لسه قدامه طويل.. هو بغبائه وضعفه ضيعه
ركب زحليقة المخدرات ومعرفش يرجع
حاول لكن محاولاته ماكنتش جد
سمع كلام واحد صاحبه كان بيضرب معاه وبطل عن طريق الاعتكاف في المسجد مع صحبة صالحة .. راح معاه المسجد وبقى للمهزلة يأم الناس.. ولما الناس تشوفه يطلبوا منه الدعاء! لمجرد إنه ربى دقنه وقاعد في المسجد.. وبعد كام يوم كان زهق ودماغه خلاص خرمت فسرق صندوق التبرعات وساب المسجد ومشي.
ولما عمه وداه مصحة بالإجبار ماحوقش فيه إنه في مكان ممنوع فيه أي مخدرات من أي نوع وهرب.. وأول حاجة عملها أخد جرعة مضاعفة تعوضه حرمان الأيام اللي فاتت.
باع مراته لديلر مقابل جرعة
سرق دهب أمه
لما البوليس جه يفتش البيت أمه أدعت فقدان الوعي وبعدها ضربته بالقلم لإنه حطها في الموقف ده هو وقتها باس إيدها وقالها إنه مش هيعمل حاجة تضايقها تاني
ومع الوقت مخه فوت وبقى يكلم نفسه.

اللي لفت نظري إن أمه كانت سايباه في أوضته وتقول مش عارفة ماله وماجاش في دماغها تعرضه على طبيب أو توديه مصحة!
اللي زي علي في حياتنا كتير
ربنا ينجينا وينجي ولادنا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: