أخبار عاجلة
الرئيسية / فيس وتويتر / أنس دنقل يكتب ….سياسة ( الهروب للمستقبل)

أنس دنقل يكتب ….سياسة ( الهروب للمستقبل)

 ..كيف تجعل البشر يتصارعون علي قرقشة التبن وهم سعداء جدا : الحكاية دي نقلا عن احد اصدقائي عضو مجلس نيابي ايام العهد المباركي السعيد..بداية القرن الحالي.. لاداعي لان اذكر لكم اسمه ( تعرفونه جيدا)..المهم..قرية تبع الدايرة الانتخابية بمحافظة بعيدة عن بلادنا ..معظم شبابها طايفة معمار ..صنايعية .. تركيب بلاط.. دهانات..تركيب حجر فرعوني حوائط.. الخ… فئة تعرفونها تماما ..تختلف كثيرا عن طايفة المزارعين..احباب الله .. الودعاء الطيبين الذين يرثون الارض في نهاية المدي ( تضربهم علي قفاهم الايمن يعدل لك ..قفاه الأيسر )..لكن بتوع المعمار دول . .ناس كسيبة..أذكياء نوعا ما .. لسانهم فالت..بانجو ..برشام صراصير وما بينهما ..احد ابناء القرية النابهين قابل محافظ الاقليم بالطائرة ..وجه له الدعوة لسهرة رمضانية بمركز شباب قريتهم..الراجل قبل الدعوة ..حدد ميعادا لها..شباب القرية المسحوبة من لسانها..اشتغلوا اجتماعات لتوجيه اتهامات بالتقصير والاهمال للمسؤول الضيف ومهاجمته ..مدعين ان النواب متخاذلين مقصرين في مواجهة الاخطاء..علاقة صاحبنا النائب بالمحافظ .. اصلا زي الزفت .. خصوصا ان احد اقربائه –نائب اخر — يترصده .. يسعي دائما للوقيعة بينهما ..سيقوم الاخر بافهام المحافظ ..ان النائب هو من حرض الشباب علي مهاجمته..احتار..هل ينبه المحافظ لما قد ينجم عن هذا اللقاء من مشاكل ..سينصحه بالاعتذار افضل .. لكن سبق السيف العذل ..يللا ..مش مهم..الاعور ضربوه علي عينه قال خسرانه..خسرانه..ماعلينا..بدا الاجتماع بالقرآن الكريم ..ايه ..كان سعيهم مشكورا..كلمة اخونا الداعي ( نفاق ابن لبوة)..قالك ..اللي ماعلهوش بالخسارة يقول ادبح اللي تستر.. كان صديقنا الداعي يخطط ان يقدم نفسه –من خلال هذه الندوة — للسيد المحافظ كنائب منتظر ليفوز بتزكيته لدي الحزب العملاق سابقا (راجع مؤلفنا ..كيف تفوز في سباقات النفاق طويل المدي )..انتهت كلمته..ليبدا دور الجمهور في طلب الكلمة وتقديم اوراق وطلبات.. التعيين ..اعمدة الانارة ..رفع كابلات الضغط العالي .. الرصف..الخ..الا ان المحافظ الهمام امسك الميكرفون قائلا : اسمحوا لي بكلمة صغيرة ..بعدها معاكم للصبح ..حجاوب علي كل أسئلتكم ح ارد علي كل طلباتكم ..اولا ..بالنسبة لمشكلة البطالة ..عاوزين تشتغلوا في الحكومة ب 150 جنية ولا 200 جنية..ازاي تعيش بيهم..انا مارضاش..ولا اقبل لكم هذه العيشة المهينة وعشان كدة.. في عندنا شمال المحافظة وادي ضخم يحتوي علي خزان مياه جوفية كافية لري 3مليون فدان..وفي جنوب البلاد وادي اخر يحتوي علي خزان مياه جوفية يسمي الخزان النوبي يكفي لزراعة 2 مليون فدان..اتفقت مع منظمة الزراعة العالمية الفاو علي تمويل حفر 1000 بئر ارتوازي بعمق 500 متر لتتدفق المياه ذاتيا ..لاتحتاج سوي لاحواض تبريد لري 5مليون فدان..سيتم تزويدها بنظم ري حديثة ..رش وتنقيط..هذه الارض توزع كالتالي: 90% للاسر المعدمة وشباب الخريجين بمعدل خمس افدنة للاسرة الواحدة علي الاقل ..وافقت منظمة الاغذية العالمية علي ان تصرف لكل رب أسرة 300 جنيه راتب شهري..لكني اشترطت عليهم اضافة لما تقدم صرف حصة تموين شهرية ..عينية مجانا ( 10 كيلو دقيق + 2 ك سكر + 2ك رز + 1ك سمن بلدي…الخ ) لكل فرد من هذه الأسر..ح نبيع لكم الفدان بالف جنية بالتقسيط علي 20 سنة.. يتبقي 10% من الارض المستصلحة..اسمحوا لي ابيعه لكبار المستثمرين كمزارع ارشادية بالمزاد العلني ..حصيلته ح نقوم من خلالها بعمل مدارس دولية لابنائكم ..نوادي رياضية ..طرق..مياه شرب نقية..منازل مزودة بالطاقة الشمسية .. و…و… ..طبعا جمهور البرشمجية من حضور الحفل الكريم خشمهم اتغشخ من الانبهار ..ايديهم اتخرمت من كتر التصقيف..وبالروح بالدم.. .هيلاهوب شالوا المحروس ..هتفوا بحياته..الندوة قلبت فرح بلدي وزفة عريس..صواريخ ملونه تبرق في السما..
بعد الندوة ..دار الحوار التالي بين النائب والمحافظ..النائب منافقا _ يافندم ..سيادتك مدرسة نتعلم منها..سعادتك اكلتهم البلوظه.._ انا بتكلم جد .._ يافندم احنا عارفين البير وغطاه!!.._ عاوز تقول اكلتهم التبن !! .؟_ تمام..تمام .._ ناس طيبين..غلابة ..بس انتو مش عارفين تتعاملوامعاهم كويس ازاي ..
يللا كانت ايام..الناس اكلت التبن..بس المشكلة حاليا..مفيش تبن..ازمة تبن..التبن بح .. كيلو التبن ب 15 جنيه اغلي من التفاح..يللا نهرب مع بعض للمستقبل .. كربنا يديم علينا تبنه ويحفظه من الزوال..امين..امين..يارب العالمين..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: