الرئيسية / ثقافة وفنون / رؤية نفسية عن شخصية نور في فيلم المركب بقلم/ منى ياسين

رؤية نفسية عن شخصية نور في فيلم المركب بقلم/ منى ياسين

(نور) البنت المحجبة اللي جسدت شخصيتها (ريم هلال) اللي نشأت في بيئة مكبوتة بتحرم عليها كل حاجة
لما بتسافر مع أصحابها رحلة على المركب الخاص بواحد منهم
المجموعة بنات وشباب وهي بتسافر من ورا أهلها
ع المركب بتلاقي بنات صحباتها بينزلوا يعوموا بالمايوهات، وفيه منهم اللي معروف إنها على علاقة بزميلهم.
وهي في لحظة كانت فيها لوحدها ع المركب، وشايفة اللي بتعوم واللي بتهزر واللي بيصطاد، والبحر قدامها والسماء فوقها بتقرر تجرب حاجة جديدة عليها ومابتربطش حجابها متعمدة فيطير من على راسها، فتحاول تعمل انه غصب عنها علشان منظرها قدام زمايلها اللي فيه منهم قالها “تك خيبة كان أحلى حاجة فيكي”
وبعد ماخلاص خلعته وأقنعت روحها إنه على المركب بس
صديقة ليها جسدت شخصيتها (يسرا اللوزي) ألحت عليها تنزل البحر وإن الميه رائعة لا تعوض وبعد شوية زن كتير (نور) قالتلها إنها مش عاملة حسابها .. صديقتها قالتلها ولا يهمك وجابت لها مايوه من بتوعها اللي ماكنتش لبسته قبل كده وهيأت لها كل السبل وبكده ماعدتش عندها أي سبب مقنع آخر.
وفي الوقت اللي خلاص هتلبس فيه مايوه وهتنزل البحر دخلت عليها صديقتها التانية اللي جسدت شخصيتها (فرح يوسف) وقالتلها “أنتي هتعملي إيه؟ هتلبسي مايوه وفي وسط الشباب اللي بره! مش كفاية خلعتي الحجاب؟ مافكرتيش في الكاميرا اللي زميلنا عمال يصور بيها كل حاجة لما يصورك وينزل صورك وأنتي المفروض محجبة”
البنت وقتها استغربت إن دي هي اللي بتقولها كده على اعتبار إنها مش محجبة وبتنزل البحر بالمايوه عادي، وكمان سمعتها وسطهم انها مصاحبة اللي بتحبه.. زميلتها فهمت نظرتها ليها وقالتلها “أنا مش وحشة وفلان ده أنا وهو متجوزين.. متجوزين عرفي لغاية مانتخرج ويبقى رسمي”.

*اللافت للنظر هنا: دور الصديق وتأثيره وخصوصا في لحظات الضعف.
– فيه اللي بيبقى مبسوط بالتغيير اللي حصل لصاحبه، طالما على هواه، وبيشجعه على التمادي والاستمرار، وأنه طالما بدأ يبقى يكمل ويعمل الحاجة صح ويستمتع على قد مايقدر بغض النظر عن طبيعة شخصيته في العادي.
– وفيه اللي بيحاول يفوقه ويرجعه لطبيعته ولشخصيته المتحفظة حتى لو كان هو معندوش مشكلة شخصية في ده

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: