الرئيسية / كتاب وشعراء / منسيّة…..شعر هبه عبد الوهاب

منسيّة…..شعر هبه عبد الوهاب

وف الأمسيّة منسيّة/ ومنيش ضيفه!!
منيش مدعيّة يا أحباب!!
وأنا عضوة!!/ أنا عضوة!!
أنا عضو اتّحاد كُتّاااااب!!!
وباعمل شِعر، وأكتب سحر، وأعصر روحي وجروحي..
بأقزقز في جناين الصّبر!!
و….
_ وإيه يعني ياست الكلّ؟!!!
م كلّ الناس بقت تِكتب
بتكتب زى م بتكتب!!
وصاحباتنا كمان عضوات ومحترمات،
وبيردّوا على السلامات،
ورافعين..
بردوا راسنا لفوق
قصايدهن للأحلام بتتبسّم/ يامحلاهن لما يقولن ف قصيدة معاني الشوق
وبيشاركوا ف جميع/ كل اللي مؤتمراتشي وجميع كلّ اللي مؤتمرات..!!
!!!!!!!!!!!!!!!!! 
_ م انا باكتب..
قصايد حبّ متشعلل، وأحيانا قصايد هّمِ!
وباسهر ويّا بيت الشعر نشرب شاى وشيشة وبنْ..
أنا باشعِر وعندي دمْ!!
وبأتصبّر بأحلامي، وباصبر واستويت م الصّبر..!
أنا شاعرة، ومين انتمْ!!؟؟؟؟
أنا باكتب عن الأصحااااااب
أنا عضو اتّحاد كتّااااب!!
أنا باكتب..
عن الأحلام اللي متخاصمة وِطفشاااااااااانه على المركب..!!
أنا باكتب..!!
وشايلة سلاحي في إيديه،
وحاسبة القلب م الأغراب/ وباكتب عن ولاد العمْ
أنا مزّة صحيح جامدة، لكني ف بأسي أستاذة وشعري سيف على رقابهم ومش باهتم!!!!
ساعات باكتب عن الدولة
وأحوالها اللي مقلوبة،
ومقبلهاش.. وأن قالوا “بلاش يا بنت”!!
وعن سنيورة بتقول شعر في الأولي،
وعن غندورة تتلوي من الفرحة على دقات قناة “التت”
وواحدة تسلّي وحدتها بقصيدة “السّت”!!
عن “الفيس بوك” وشطانه/ على كل البرامج دي،
وعن كل الجرايم دي بآخد وأدي ..
عن “الواتس آب” وأهواله وأحواله
وكل ما يجي بعياله باخش أعمل لنفسي “بلوك”..
و”ادلّتْ” روحي مِن فيسكوا
وباعمل للمواجع ..” كَت”
وباغرف من بحور الشّعر!!
باقرف من بحور “النت”!!

مليشي ف الثقافة اصحاب، وعمري بشِعري ما بساوم/
ولا ايدي ف يوم تتمدْ
وماشية فوق حدود السيف، وعايشة بين سطور الجدْ..
ومعرفتش طريق الزيف، وعندي الشِعر زيّ الحَدْ!!
ياحد.. اتنين.. تلات.. أربع..
ياجمعة م تيجي نكتب سطر!!
مليش أصحاب مِن الشعرا،
مانا أصلي مصاحبة السّتر
ولا يشرّفني يوم أبدا أقول الشّعر فوق جيفة
ولو هاكتب قصايد درْ
أنا حرّة ولساني حر،
وصوتي حرْ،
قلمي مش هيقبل جَرْ
أنا شطاني جرئ جدّا
أنا لحمي ف سطوكم مُرْ..
ما اخافشي أكتب وأقول الحق.. قُول الجدْ!!
أنا هاخرج من الملعب
واسيب اللعبة، مش هالعب
تروح اللعبة بدروعها لأيها حدْ
مادمتم مش هتاخدوني معاكم يوم لأمسيّة/ لأني ستْ مش ليّه ف أماسي الوِدْ!!!
أنا موافقة أكون جدًا.. تملّي معاكوا مَنسيّه!!
ومش هاسكتْ، ولا اتهدد ولا .. هاتهدْ!!!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: