الرئيسية / ثقافة وفنون / انطباع عن مسلسل اختفاء برؤية منى ياسين

انطباع عن مسلسل اختفاء برؤية منى ياسين

 

لو هتكلم عن طقم التمثيل فـ طبعا نيللي كريم في المقدمة.. هي بقت أستاذة في اختيار أدوارها .. أداءها وتجسيدها للشخصيات وملامح وجهها الطفولي وتعبيرات خلجاتها بيضيفوا مصداقية غير عادية للشخصية..
محمد ممدوح أستاذ بجد.. يخليك تكره شخصية البطل من أول وهلة.. نظرات عينه ورفعة حاجبه ولغة جسده بارعة جدا وخاصة مع تقدم الشخصية في العمر وطريقة مشيه وكلامه.

هشام سليم وبسمة حسيتهم عاديين.. مفيش جديد يعني .. ماتعبوش في تجسيد الشخصيات.. ردود أفعالهم وطريقة كلامهم واحدة عموما في غالب أدوارهم.

*مشهد النهاية الصامت بين نسيمة وسليمان كان عظيم.
*مشهد فريدة وهي بتقيد الكبريت وعلى وشك حرق الرواية مع صدمتها لما عرفت إن شريف ضحك عليها كان رائع.. وكلامها مع أبوها في مشهد سابق عن إحساسها بالوحدة (الكتابة هنا كانت عالية جدا)
* نسيمة جسدت شخصية المرأة لما بتعيش مع حد بتحبه بجد وبيحبها.. ولما بتعيش مع حد مابتحبوش.

مشاهد مافهمتهاش:
– أول مشهد في المسلسل “طالب يخبر أستاذته فريدة بأنه رأى كابوس بأن شقته تحترق وبأنها كانت معه ومع الأحداث بالفعل يموت الطالب محترقا داخل شقته” إيه فايدة المشهدين دول في المسلسل؟؟ إيه علاقتهم أصلا بالأحداث الرئيسية!

-أن يظل شاكر في المصحة النفسية بعد أن استطاع أن يهرب مع نسيمة!! إيه اللي رجعه تاني وخلاه يفضل 50 سنة هناك ويفقد الذاكرة بالتدريج!! وعرف منين مكان نسيمة وشريف بيسأله عليه؟ المفروض إن علاقته بنسيمة اتقطعت وماشافهاش من وقت هروبها واتفاقه معاها إنها هتسافر لبنان!!

– الحظ لعب دوره مع نسيمة فلولا مساعدة الراهبات لها لربما عادت لسجنها مع سليمان
– الحظ لعب دوره مع فريدة فلولا اختطافها وهي مع شريف ما علم أحد ولظلت حتى موتها
– الظابط كان متعاون جدا جدا.. اللي هو بييجي ع الندهة ?
– الحظ هو اللي جعل سولافة تزور شريف وهما خلاص بيشيلوا من عليه الأجهزة وتنقذ حياته.

وأخيرا أوجه تحية خاصة للقائمين على العمل وأخص بالذكر المؤلف أيمن مدحت.. المسلسل مكتوب حلو جدا والتمثيل والإخراج رائع فعلا.. المسلسل من أول مشهد في أول حلقة وأنت عايز تتابعه.. ماينفعش تفوت لقطة وتقول عادي متوقع إيه اللي هيحصل..
عامل الجذب والإثارة موجود من أول حلقة لآخر مشهد.
أنصح بمشاهدته

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: