الإثنين , ديسمبر 9 2019
الرئيسية / فيس وتويتر / أنس دنقل يكتب ….تأملات في مسالة الضمير

أنس دنقل يكتب ….تأملات في مسالة الضمير

دائما الحكومات الفاشله تحمل الشعب الاهبل مسؤلية فشلها..والناس غلابه وعبط..زي ماقال امير الشعراء احمد بك شوقي..ياله من ببغاء عقله في اذنيه..تناقش اي واحد في اي موضوع يقوللك..اصل معندناش ضمير..ياعم الضمير ده يعلمه ويحاسب عليه ربك..الضمير ده ..اخره باب بيتكم.. علي اقصي تقدير..ويمكن نحتاج ان نستاذن..ونفتش بيتك.. لان ضميرك مخروم شويه وبيسرسب ويخالف القانون العام..فبلاش والنبي تصدعنا عن الضمير ..الدوله لاتحاسب الناس علي ضمائرهم ومعتقداتهم.. الدوله قانون ..الدوله تشهر سيف القانون العادل الرادع لكل من تسول له نفسه الخروج علي القانون..القانون الاعمي العينين .. الذي لايفرق بين الضعيف والشريف وبين فاطمه بنت محمد وامراة من الموالي..ماالفرق بين المصري في بلادنا وفي الخارج ..في بلاد تحترم القانون ..والمصري في بلادنا.. قانوننا الوحيد المطبق بجداره وبحزم ..اللي له ضهر ماينضربش علي بطنه..في بلادنا لاتوجد رقابه علي القائمين علي تنفيذ القانون..اذا رايت سياره تسير عكس اتجاه السير ..فاعلم انها سيارة مدير المرور..سياره مفيمه..تبقي بتاعة قاضي المدينه..عيل اهبل سايق عربيه وبيعاكس..اكيد ابن اخت المحافظ..المساله لاعلاقة لها بضمير ..لا..دول مسؤولين امنوا العقاب فاساؤا الادب..بعدين منظومه فاسده متركبه علي بعضها كده..مولانا السلطان قنصوه الغوري..يختار حكام الاقاليم من مماليكه وخدمه..والسنجق يجيب العبد بتاعه..وكل عبد من دول يشوف سيده عاوز ايه..ويلعن ابوالشعب ف كل كتاب..الشعب اللي مايملكش.. يغير شيخ غفر بلدهم ..ياخد علي قفاه.. بال …لامؤاخذه..بس عشان الشعب ابوديل ..ميزعلش ويتقمص نقول له ونفهمه نحفظه..ان المساله ..ضمير..مفيش ضمير..وسبب بلاوينا ياشعب ياحمار..هوغياب الضمير ..و…ياسيدي افهم واعرف ..ان الموضوع لاعلاقه له بالضمير ..انما ..نمل بيركب علي كتاف نمل..امسك السلم من تحت وبص..رئيس القريه يسمع ان رئيس المدينه حيزوره ..تلاقيه قالع اللباس..بلبوص.. بيسلك بلاعه الحمام ..احسن رئيس المدينه بتاعه ..يتزنق ..ويعمل ببيه ويزعل ..رئيس المدينه ينضف الشوارع اللي يمر فيها المحافظ..ويرمي الزباله ف شوارع الشعب..اما لو الريس جاي..تلاقي المحافظ شايل الزباله فوق قرعته وبيلحس المجاري ..دي مش مسالة ضمير ..لا..دي مسالة..ولاء لمن اجلسني فوق هذا الكرسي..وخوف من غضبه…لوكان الشعب..هو صاحب السلطه والسياده..كما يقولون ..كنا حنشيل الشعب ف عنينا..لكن بصراحه احنا الشعب.. ولاحاجه..واخر مايمكن ان يصل اليه الشعب ..هو وظيفة قواد اومنافق علي اكثر تقدير.. ودي مساله مش بسيطه ولاسهله ..عمامك القوادين ممن سبقوك في شرف المهنه ..مش حيسيبوك تعدي وتترستا ..علي كتافهم وتضايقهم ف اللقمه ..علي عينهم ..بصراحه ياعزيزي المواطن..انت وانا وانتم ..مثبتين علي وظيفة.. شرابه خرج.. فلاتنسوا ..وانسوا موضوع الضمير..الضمير ده ممكن تلاقيه ..ف بلاد الروم..لان عندهم قانون لايفرق بين الناس..شريفهم وضعيفهم .. وعندهم معايير ونظام ..لكن احنا ..نظامنا ..يااخوانا.. شيلني واشيلك ..حتي نظام لايمني ع الفكه ..اللي كان عندنا زمان .. انتهي ..لان اللي يعوزه البيت..يحرم علي الجامع..اولادنا اولي بخيرنا..وانت ياجاهل سيبنا لك..قعر الحله.. وحدوته الضمير..واحكي لنا ياجاهل يابن الاجهلين..حدوته الضمير..واسرح وغطي قفاك..قبل ماالقلم يرن عليه ويزغرد..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: