الإثنين , سبتمبر 16 2019
الرئيسية / كتاب وشعراء / إعمليلي قهوه مانو ……شعر أحمد الخدرجي

إعمليلي قهوه مانو ……شعر أحمد الخدرجي

” إعمليلي قهوه مانو
جوايا حاله حتتكتب دلوقت
شرط الكتابة علبتين روثمان
مع فنجانين قهوه وساعات عشره
مش حاجه ضرورية انما
حالة تعود ربما
وعشقتها عشق ابن وسخه فأصبحت لازم ”
……………..
ماتخلينيش دايماً أحِن
لمرتبه ع الأرض
وكمبيوتر
ومخدتين فوق بعض
ومسلسل قديم
وأوضه مكركبه
وعفاريت
عماله تطلع من كمام جاكيت
علقته على مسمار عفي ورا باب
ماتخلينيش مدمن غياب
نسيني ريحة برفانات
هربت من الفساتين وسكنت سقف أوضتي
نسيني ريحة ورده حمرا انا سيبتها ف كتاب
نسيني ريحة اسكندريه عشان تعبت
نسيني إسمي وشكلي لما كتبت
( العزله أفضل من ونس كداب )
…………….
” خايف ما تكملش القصيدة لأي سببٍ ما
خايف ما اكونش دخلتها بودي
ممكن ما اكونش دخلتها طاهر
لكني دايما قلبي متوضي ”
……………
ماتخلينيش دايماً أحن
لمشيتي ع البحر
ولقعده ويَّا ” حسام حسين ”
ولأمنيات وقعت ف قلب البحر
وشوارع اتسرقت ف غمضة عين
خليني كافر بالغُنا ع البحر
كافر بضلي لو طلع م القبر
ضلي اللي شايل ذكريات الليل
والزفة و الدراويش
وأغاني ع الكورنيش
يمكن ما تتعادشي
خليني كافر باللي فات كله
يا أكورديون مجنون .. قال اللي ما اتقالشي
……………
” فنجان كمان يا حبيبتي من فضلك
داخل بقلبي وذكريات ضلي
ويَّا القصيده ف امتحان شفوي
والقهوة مزيكا
القهوة خلفية
لحاجات كتير جدا متبعتره فِيا
هيَّ كده من يوم هبوط ” آدم ”
دم الكتابة بشكلها العفوي ”
………….
ما تخلينيش دايماً أحن
لصورة مجروحه
روحها اللي مدبوحه
من دمعتين فجأه
أنا سيبتهم ع الأرض
من بوسه على رجلها
طرحتلي دم و ورد
صور الأشعه
نتايج التحاليل
كوابيس كتير بتخشني بالليل
خليكي أمي لحد ما اقابلها
أمي اللي صوت تنهيدها من يومها
طوابير خيول ..
طلقت ف روحي صهيل
……….
” آخر سيجارة ف علبتي للأسف
دخان ف أوضة جديدة معرفهاش
وقصيدة تانية لسه ما اتكتبتش
عفاريت كتير ماسكين بنادق رش
عفاريت كتيرة نشانها بيخيب
وانتي الوحيدة جنبي دلوقتي
بصة عينيكي نشان ما بيخيبش “

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: