اولا .. اسف على العنوان لو كان فج حبتين .. بس دي طريقتي في الكتابة لما حاجة تستفزني .. ثانيا .. مين دي او مين دول اللي بيقولوا عليهم مبدعات عرب .. ومنين اساسا .. ما انا راجل صحفي ومطلع .. لاعمري شفتهم ولا سمعت عنهم ولا اعرف واحدة منهم .. يبقى مين بيكرمهم ويمنحهم الصفة دي .. وتحت اى بند .. وبموافقة مين ان شاء الله؟
………..
امبارح سمعت محمد الباز في برنامج 90 دقيقة بيتكلم عن واحد اسمه تامر الجندي .. هو اللي ورا المهرجانات دي .. ومش من امبارح الكلام ده .. ده من 5 سنين فاتت.
مين بقى تامر الجندي ده وايه صفته .. ولا حاجة .. طيب أخد اذن او تصريح منين عشان يعمل مهرجاناته في المحافظات المصرية ومتساب كده دون رقيب او حسيب ؟ .. محدش بيرد .. طيب ايه اسماء القنوات الفضائية المعروفة واسماء الجرايد المصرية اللي ع اللوحة كرعاة للمهرجانات دي؟ .. اتضح ان مفيش ولا حد منهم راعي ولا يحزنون .. الراجل اللي اسمه تامر الجندي حابب يعمل لمهرجانه شكل ومنظر .. فحط اسماء القنوات والفضائيات كرعاة.
طيب ارمي كل الكلام ده ورا ضهرك .. لكن نبص على اليافطة بتاعت المهرجان نلاقي مكتوب عليها : انها مصر .. وهنا بقى الجريمة العظمى اللي مش قادر اتخيل انها ممكن تعدي من غير ما احاسب الجدع ده واسجنه.
……..
السؤال هنا .. ازاى الراجل ده بيعمل الحاجات دي من ه سنين ومحدش اعترض ولا قاله .. مين عطاك إذن بكده .. ؟ ولا حد فتح بقه واتكلم .. كأن الراجل ده ( مضبط ) ناس كتير عشان يسكتوا على اللي بيعمله ويتكسب منه أكيد .. ياريته عمل كده في بيتهم وقافل عليه بابه .. يارب يقلع ملط ويرقص .. هو حر مادام في بيته .. لكن يوصل الأمر للمهزلة دي .. فمش حاقول عيب .. لأ .. دي جريمة .. ولازم أحقق فيها وأحاسب عليها.حاقولكم على حاجة .. كان ليا صاحب صحفي خليجي ميعرفش السما م العما .. على أده خالص .. نزل مصر ورجع ومعاه درع تكريم كمبدع عربي .. طبعا لانه صاحبي وواخد عليه سألته : مين ابن ( ….. ) اللي عطاك الدرع ده .. ودفعت كام عشان تاخده ؟! .. ضحك وقاللي : اهي كلها سبوبة ياعم احمد .. واحد اتصل بيا وقاللي انت مبدع .. حاقوله لأ .. مش ممكن طبعا.
……..
صاحبي ده مرضيش يقوللي هو دفع كام او مدفعشي .. بس من كلمته ( هى سبوبة ) .. عرفت المهرجان ده بيتعمل ليه .
اهو صاحبي نموذج حى اتكرم كمبدع وهو على أد حاله في المهنة .. طيب المبدعات بقى دفعوا ايه عشان يروحوا مصر وياخدوا دروع تكريم .. بقولكم مفيش واحدة منهم معروفة ولا ليها اسم ولا صفة .. رايحة بس تتشهر وتتعري فوق وتحت .. والاسم مبدعة.
طيب ياستي المبدعة .. حد قال لك ان التكريم حيبقى على جهودك في مجال الإعلام .. ولا على جمال سيقانك وصدرك وجسمك كله .. ومين المعتوه ( العرة ) اللي سمح لك تطلعي بالمنظر ده ومكتوب وراكي انها مصر .. كأن مصر راعية العري وقلة الأدب وقلة القيمة. مصر اللي طلع منها عبد الوهاب وام كلثوم ونجيب محفوظ ويوسف ادريس وفاتن حمامة وصلاح جاهين ونجم والابنودي .. وغيرهم كتير اوي .. حترعي مهرجان فاجر وقذر بالشكل ده؟
……..
عارفين .. لو كانت واحدة من المبدعات دول معروفة على مستوى الوطن العربي كنت ناقشت الموضوع بحدة أقل .. لكن المصيبة اني معرفش واحدة فيهم ولا منهم .. اللي واقفة ونص وراكها باينة وحتة كمان يبان المستخبي .. والتانية مصدرة لنا صدرها كأنها داخلة مسابقة للمرضعات .. كده عيب اوي في حق مصر .. ان الكلام ده يجري على ارضها من غير علم المسؤولين .. وياريته من امبارح بس .. لأ .. ده من 5 سنين .
طيب حتسكتوا على كده ولا ناويين تعملوا حاجة ؟
حد يرد عليا .. هى المسألة بقت كده .. سداح مداح .. كل اللي عايز حاجة يجيب منها قرشين يعملها حتى لو كانت على حساب سمعة دولة بحجم مصر ؟.
حتحاسبوا الراجل ده صح وقانوني ولا حتشدوا ودانه وتقولوا له : متعملش كده تاني .. يالئيم ياخلبوص ؟
حتاخدوا المسألة جد ولا بجملة التهريج اللي حاصل .. مجتش يعني على الافندي ده .. أديني مستني وحاشوف أخرتها إيه .. هو احنا ناقصين قرف وعاهات .. ؟ .. ياتكم الهم .. داهية تاخدكم كلكم .. عالم ارزقية ولاد كلب .. بس العيب مش عليهم … العيب على اللي شاف بعينه وطنش .. يمكن عجبته وراك فلانة ولا صدر علانة .. فبص بس عليهم ومشفش الكلمة اللي مكتوبة وراهم .. انها مصر .
والله العظيم لو مصر دي كانت بني ادمة وبتنطق كانت إديتكم بالجزمة .. بقى انا بهية ام طرحة وجلابية.. يتعمل فيا كده .. والكبار ساكتين .. ؟
لا كان ولا عاش اللي يمسك يامصر بأى سوء .. واللي ميعرفش قيمتك يورينا عرض اكتافه .. والباب يفوت جمل ومعاه تلات واربع حمير!
……
أضفت الصورة دي لأنها عجبتني بجد .. هى دي مصر الشقيانة العرقانة اللي ريحتها مسك .. وضحكتها شمس .. وطلتها قمر .. هى دي مصر ياولاد الهبلة
يالا سلام
