الرئيسية / كتاب وشعراء / عم رفاعى…..شعر : أحمد حواس

عم رفاعى…..شعر : أحمد حواس

( عـــم رفاعــــــي )

مرة زمان ..
كنت ساعتها لسه يادوب
قافل تلاتين ..
يعني أظن ماكنتش واعي
كنت فى قهوة ..
لسه بأروحها لغيت دلوقتي
موجوده فـ شارع متفرع
من شارع ٢٦
يومها قابلت المدعو ( رفاعي )
عم رفاعي .. كان ايامها
بيلعب فــ الخمسه وستين
بس صاحبنا ده كان حدوته
لابس بدله مقلمه زيتي
وعلي دماغه لقيت طربوش
اه والله لابس طربوش
وانا من يوم ما وعيت ع الدنيا
مالمحتوش غير فى الأفلام
قلت تمام .. ده انت زبوني
__ ممكن اقعد
_ قاللي اتفضل
ايه اخبار معاليك وسيادتك
قاللي بخير ..
__ وياك احمد ..
_ أهلا يا احمد ..
واتكلمنا فى كل كليله
وطلع عم رفاعي دهون
واحد م الظباط لاحرار
وبيتفشخر انه عارفهم
واحد .. واحد
قلتله بس يا حاج رفاعي
دول اشرار .. مش احرار
حتي كبيرهم عبد الناصر
كان جزار ..
كان مجنون بالسلطه
ودَّبح ف الثوار
رد عليا بكل تناكه
وقاللي : يا جاهل
تعرف ايه عنهم يا حمار
دول اسيادك .. وحموا بلادك
لولا وجودهم كنت زمانك
شغال سايس
فى اصطبلات الاستعمار
ده على اساس ان انا دلوقتى
بقيت طيار ..
اصحي يا والدي
ما تهطلشي ..
وتزعقلي .. وتخبطلي
نص شباب الشعب
عواطلي ..
عبد الناصر خادها مقاوله
هو وحاشية امن الدوله
دمروا جيشنا
ونغصوا عيشنا
وأما اتسم وغار فى نصيبه
سابها فى ايد
مجنون بزبيبه ..
زاد فى خرابها
غيب جوه السجن
شبابها ..
واللى بينطق بره السور
كان بيبات مدفون فى ترابها
هوب ونشوا انور افندى
فى قلب منصه ..
جالنا حبيب الكل مبارك
هي المشرحه كانت ناقصه ..
رقّص كل الجيل ع السلم ..
ولا عارفين نشكي ونتألم ..
ولا م الخوف عارفين نتكلم ..
وانت ياعم رفاعي تقوللي
دول اسيادك ..
دول عساكرنا ..
اللي بدال ما يخافوا علينا
سرقوا ف خيرنا ..
باعوا ضميرهم ..
واما نطقنا دبحوا ضميرنا ..
كلب وبيسلمها لكلب ..
يتحكموا فى مصير اجدادنا
وف مصايرنا ..

فجأه وعم رفاعي اتعصب
وقاللي يا فاجر ..
ياللي ربايتك ناقصه ربايه
ياللي لخير اسيادك ناكر
راح مناولني
بالكوبايه .. والطقطوقه
وست كراسي
وأيه … مش فاكر
اصلي جريت من وشه ساعتها
بس كفايه انه سمعنى
لحد الآخر

عم رفاعي
ربنا كرمه يا ناس دلوقتي
وبقي إذاعي
واقف فى ميدان التحرير
ماسك علبة سلمون فاضيه
بيخاطب فى الجيل الواعي
ويقول سيسنا ..
ما اسموش بلحه ..
واللى ح يشتم على ريسنا
ح ازعل منه
وابطح نفسي عليه فى دماغي
والبسه جنحه ..
عم رفاعي يا عيني خلاص
ناس بتقول بقي عنده زهايمر
حبه يعيط ..
حبه يزغرط ..
حبه يزمر ..
وأما قابلته ..
قلتله فينك يا ابن الناس
لسه فاكرني
بص فى وشي شويه وقاللي :
ايوه انا فاكرك
بس مافيش داعي تفكرني
علشان كارهك
عيل مافيهوش الا لسان
داهية فى شكلك
Ahmed Hawaas

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: