الرئيسية / فيس وتويتر / هشام أبو المكارم يكتب :غياب الوعي ده مش عيب خلقي احنا مولودين بيه حضرتك!

هشام أبو المكارم يكتب :غياب الوعي ده مش عيب خلقي احنا مولودين بيه حضرتك!

سنين طويلة حولتوا فيها التعليم فيها من المدارس للسناتر، واستبدلتوا الكتاب المدرسي اللي بيكتبه خبراء تعليم وتربية بملزمة المدرس، سنين وانت سايب الإخوان والسلفيين طايحين في المجتمع ينشروا جهلهم وغبائهم وخرافاتهم وانت مصهين، ولما حبيت تواجه رميت الإخوان في السجون وبدل ما تعمل خطة حقيقية لنشر الوعي، سلمت الإعلام لأحمد موسي وتوفيق عكاشة عشان يغسلوا دماغ البشر بس لصالحك انت !
بص سعادتك علي الشوارع المليانة إعلانات عن الدروس الخصوصيه اللي مفروض انها ممنوعة، بلاش كده، مشفتش اعلانات العلاج بالقران وفك السحر وانقاذ الملبوس؟
تعرف المصريين بيصرفوا كام مليار علي الدجالين والمشعوذين؟، وكام مليار زيهم علي المخدرات؟، يا تري هتتفاجيء لو قلت لك ان الترامادول وغيره من المخدرات بيتباعوا علنا في الشوارع، وان التجار عندهم خدمة توصيل؟
طيب هو اللي قال انه هيعالج الإيدز بالكفتة مش بيساهم في تغييب وعي الناس؟ واللي أعلن أن مصر في 2011 أسرت قائد الأسطول السادس الأمريكي كان قصده يبني وعي الناس؟
اللي نزلوا يتظاهروا ضد كورونا في إسكندرية دول صنعة إيدينا وحياة عنينا، وفيه زيهم ملايين ..
انت اتفزعت ليه المرة دي بالتحديد بقي؟
أقولك أنا، لأن المرة دي كارثة عدم الوعي هتطولنا كلنا، من سواق التوك توك لغاية أكبر ناس في البلد، المرة دي الكلام عن الجهل وغياب الوعي مش ترف، ولا تنظير مثقفين، لأن ده موسم الحصاد، وكلنا هندوق الثمرة، وبالهنا والشفا!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: