الأحد , مايو 31 2020

الرئيسية / كتاب وشعراء / عم دور مو لاقي .. شعر : غزوان بوسطه چي

عم دور مو لاقي .. شعر : غزوان بوسطه چي

عم دور مو لاقي حالي…
ضايع من قعدة البيت…
والدنيا جاية ع بالي…
قضّيت لحتى صدّيت…
من القعدة تقرموا جنابي…
ختيرت ولسى بشبابي…

مابعرف كنّي جنيت…
كرهتني مرتي وأهل البيت…
حتى تيابي كرهوني…
ولادي ماعم يحاكوني…
ربي لاتبرّك رجال ف بيت…
ياويلي والله طقّيت…

بتنزل ع الشارع مزموع…
لالك شغلة ولا عملة…
كلشي بالسعر مرفوع…
والحجّة تجار الجملّة…
لافي محاسب ولا راقوب…
كلشي ماشي بالمقلوب…
اصغر طبخة حقا إلوف…
بلا شغلة قاعد منتوف…
ولادي هلكوني طلبات…
ماعم لحق قلبي مات…

حجر وحظر وكورونا…
يا خلق الله إرحمونا…
من وين بدنا نلاقيها…
هي القصة ومافيها…
لسى ماخلصت الحرب…
اجتنا بلاوي جديدة…
كورونا زاد علينا الكرب..
صفينا ع الحديدة…

وينك ياحكومة الحقونا…
الجوع أخطر من الكورونا…
وال مابطس من الغربال….
بكون أعمى مافي مجال…
حاجتكن تشتغلوا فينا….
كلشي صار فينا مكفينا…

ربي ياعالم بالحال…
رمينا عليك الأحمال…
تقلت علينا الحملات…
مالنا غيرك بالشدات…

انت وحدك يارحمن…
تجعل سورية بأمان…
وتحمي بلدي وأهاليها…
ومن كل داء تبريها…
بسم الله رب الشام…
أمن وإيمان وسلام…

بقلمي…غزوان بوسطه جي”.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: