الإثنين , يوليو 13 2020
الرئيسية / رؤى ومقالات / احمد عفيفي يكتب : ايه اللي بيحصل ده؟!!

احمد عفيفي يكتب : ايه اللي بيحصل ده؟!!

في فيلم دماء على الأسفلت اللي أخرجه عاطف الطيب وكتب قصته اسامة أنور عكاشة ؛ كانت بنت حسن حسني بتشتغل في الدعارة وبتساعد ابوها في تربية عياله.. وهو عارف ومغمض عينه ومطنش.. وفي فيلم خيانة مشروعة كانت سمية الخشاب شغالة برضه في الدعارة.. ولما أخوها العاطل حب يعمل فيها دكر قالت له : خلاص انا حاقعد في البيت واتشملل انت وشوف حتجيب فلوس منين .. قام حط جزمة في بقه وباصص في الأرض وفتح لها الباب بنفسه؛ ويمكن دعا لها تترزق بكام زبون مريش.
………….

لو عايز تبرر الوساخة مش حتغلب.. زي بالضبط اللي عملته اللي اسمها حنين حسام : انا عارفه ان الحظر وقف حال ناس كتير .. وكلنا عايزين ناكل ونعيش والمركب تمشي.. فأنا عملت شركة ومضيت عقدها وعايزة كام بنوتة متقلش عن ١٨ سنة بس تكون ( مزة ) وحلوة وتطلع لايف على اليوتيوب وتتكلم مع الولاد من غير ماتقلع.. بس تكون لطيفة .. تاخد وتدى مع الزبون وكل ما تكتر زباينها كل ما الدولارات تزيد وتوصل ل ٣٠٠٠ في الشهر..
حتقبضي ٣٠٠٠ دولار في الشهر وانتي قاعدة في أوضتك.. محدش حيلمسك.. بس حيتفرج عليك من بعيد لبعيد ويعيش بقى مع نفسه.. ولو زودها ولا حاجة ولقتيه بيعمل ( مع نفسه ) حاجة عيب ومش لطيفة.. دي مشكلته مش مشكلتك.. يقوم يتنيل على عينه ويستحمى.. وانت تلطشي الدولارات!!

………..

انا طبعا ببالغ شويتين.. بس اللي بتعمله حنين حسام ميخرجشي كتير عن اللي بقوله.. زي بالضبط البنات اللي في الكباريهات.. مش مطلوب منها غير انها تغمز للزبون بعنيها الحلوة وتقعد معاه .. وعلى أد ما حيفتح أزايز خمرة.. على أد ما الحلوة تقبض. عايزة بقى تروح معاه البيت .. بشوقها .. عملت فيها شريفة واعتبرت ان شغلتها دي عادية.. هى بقى وضميرها.

………..

واحدة مش بتدافع عن حنين .. لكنها بتستغرب.. الدنيا ليه قايمة ع البنت وسايبين واحدة وسخة زي سما المصري.. والسؤال وجيه مفيش كلام.. بس الرد : سما المصري مرة بنت ستين كلب قذرة.. وبتاكل عيش من وساختها.. بس معملتش شركة وطلبت بنات حلوة ومزز يتسامروا مع الشباب لايف مستغلين هوسهم الجنسي.. وكل ما تكوني بعيدة كل ما ( يهيج) اكتر.. نظام ( شوقتك ما دوقتك) .. لكن واحدة من بتوع التيك توك طلعت وكانت اكثر جرأة وقالت عن نفسها انا ( بشوق وبدوق ) مع ضحكة خليعة تخليك تسرق دهب امك وتبيعه عشان تدوق!! .

…………

هو فيه ايه .. ايه اللي حصل ياجماعة .. معقولة بنت زي حنين دي ليها أهل .. جابها راجل يعني.. أب حمش وغيور .. ولا كلهم زي حسن حسني في دماء على الاسفلت واخو سمية الخشاب في خيانة مشروعة؟

………….

بس السؤال بقى بجد : هى البلد ليه سايبه المسألة بالشكل ده .. ليه سما المصري اللي في كل فيديو تستعرض جسمها فوق تحت من ورا ومن قدام وتتكلم كلام متقولوش واحدة مومس في حضن اللي مأجرها وحيدفع لها.. سما المصري عاملة فيديو وهى بتاكل صوابع محشي.. ( بصوا ع الصورة واحكموا انتو عليها ) .. واحدة زي دي مادام متسابة كده على حل شعرها وقاعدة في فيلا ومش عارفه تودي الفلوس فين .. خلت واحدة زي حنين تفكر ازاى تستثمر الوساخة وتملا البلد بنات وسخة .. ماهم سايبين سما .. اشمعنى حيجوا عندي ويعملوا فيها رجالة؟

………..

المسألة بقت خطيرة ياجماعة .. اللي يعرف يجيب قرش يجيبه بأى وسيلة .. عندك محمد رمضان مليونير وهو حشرة ولا يسوى. عندك احمد موسى بيقبض ١٠ مليون في السنة وهو أجهل من دابة.. عندك شاكوش وبيكا وشطا.. بقوا نجوم مجتمع وركبوا البي إم وحسابهم في البنوك متعدش.. في حين شايفين الناس المحترمة طافحة الدم ومش لاقين ياكلوا.. رمضان راكب لامبرجيني وطبيب راجع من الحميات راكب ميكروباص.. شاكوش بقى عنده فيلا ومهندس اتصرف على تعليمه آلافات مش لاقي غرفة بعفشة ميه.

عندها حق حنين .. هى فهمت الوضع صح وجابت م الأخر: حتخرج من كلية الأثار واقبض كام؟ طيب لو شركتي نجحت وبدل البنت بقى عندي الف بنت في القناة والعملية انتشرت ونجحت حابقى مليونيرة.. مش ابقى غبية لو عملت فيها بنت ناس ومؤدبة وغيري بيلهط الفلوس لهط بالهجص والهشك بيشك ومحدش بيحاسب حد .. حتقوللي الشرف والكلام القديم ده حاقولك شرف ده يبقى خالك وشريفة دي تبقى مرات ابوك!!!!

……….

اسفخس على ده منطق.. واسفخس على اللي شايف الوساخة مالية البلد وساكت عليها زي اخو سمية الخشاب ل ( حين ميسرة )!!!!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: