الأربعاء , يوليو 8 2020
الرئيسية / ثقافة وفنون / احمد عفيفي يكتب : ” الاختيار ” .. حسنة الاخوان الوحيدة!!

احمد عفيفي يكتب : ” الاختيار ” .. حسنة الاخوان الوحيدة!!

لو انا من باهر دويدار مؤلف مسلسل ” الاختيار ” لكنت بعت برقية فورية لجماعة الاخوان اللي ” مش مسلمين ” ، اشكرهم فيها من كل قلبي انهم أمدوني بمادة فيلمية تاريخية موثقة بالصوت والصورة لكل جرائمهم اللي عملوها من ساعة ما اتنيلوا ومسكوا الحكم .. لازم يشكر محمد مرسي شخصيا على الخطاب الأخير اللي ” اتشقط ” بعده وراح في سكة اللي يروح ميرجعش .. الخطاب المسخرة اللي انا فاكر وقتها كتبت عنه مقال نشرته بجريدة التحرير عنوانه ” المجرم ” .. الخطاب اللي اتحدى فيه الشعب المصري وقالك : انا جيت بـ الشرعية ومتمسك بـ الشرعية وحاعيش واموت فداء لخالتي شرعية .. ده اللي عندي .. واللي عندكم اعملوه!

ولازم باهر دويدار يشكر كمان ” القفا ” اللي اسمه محمد البلتاجي اللي وقف على منصة رابعة وقالها بالفم المليان : كل اللي بيحصل في سيناء دلوقتي ممكن يقف في التو واللحظة اذا عدل السيسي عن انقلابه العسكري وعاد مرسي الى قصر الاتحادية .. في اعتراف منه قاله بمنتهى الغباء اللي مالوش مثيل عن ان الاخوان همّا المسؤولين ولا أحد غيرهم عن كل العمليات الارهابية اللي حصلت في سيناء.

وكمان الشكر موصول للراجل ابو دقن وشكل أمه يقطع الخلف ويقطع الخميرة م البيت اللي قال بمنتهى الصفاقة والتحدي الغشيم : لو مرسي مرجعش واسترد شرعيته ، حتلاقوا العربيات المفخخة والأحزمة الناسفة في كل مكان على ارضك يامصر ..!

انا كمؤلف وكمخرج حاتمنى ايه اكتر من كده عشان اعمل مسلسل يُظهر الوجه القبيح والغبي للإخوان .. على رأى المثل ” من دقنه وافتل له ” .. ومثل تاني برضه ” لولاك يا لساني ، ما اتسكعت يا قفايا ” .. انا لا ألفّت عليكم ولا قلت على لسانكم حاجة انتوا مقولتهاش .. وكله يامحترم بالصوت والصورة .. مجبتش حاجة من عندي!

عشان كده مسلسل ” الاختيار ” شادد الناس اوي وعامل اعلى نسبة مشاهدة ربما في تاريخ الدراما التليفزيونية ، لان احداثه كانت لسه امبارح مش من 100 سنة فاتت ..كلنا فاكرينها وفاكرين اعتصام رابعة واللي حصل فيه .. فاكرين الخيام اللي نصبوها تحت العماير المحيطة بالميدان والمدارس اللي احتلوها وبقت إقامتهم الدايمة فيها .. النسوان تغسل وتنشر غسيل عيلتها ” الوسخ ” ع الحبال .. والافندية مكنوش حاسين انهم في حرب مع النظام .. فمفيش مانع ابدا اننا ننام مع نسواننا في الخيام ونقوم عادي نستحمى في الطل نافشين ريشنا ، قال يعني جابوا الديب من ديله!

ايام كانت سودا الله لايعودها ، لحد ما حصل الفض ، ولقينا كل القيادات ” كلهم بلا استثناء ” هربوا زي الفيران وسابوا المضحوك عليهم هما اللي يدفعوا تمن غبائهم اولا ، وغباء اللي ضحكوا عليهم وقالوا لهم اللي بنعملوا ده من اجل رفع راية الاسلام ونحارب به اعداء الله وزبانية جهنم ” اللي همّا احنا ” !!

مادة فيلمية محصلتش .. قدمها الاخوان على طبق من ” دم ” للمؤلف والمخرج .. فعملوا مسلسل شديد الواقعية .. شديد الخصوصية .. شديد التعبير عن وضع مخز عشناه وشوفناه بعنينا ، محدش قلنا عليه !

مش حاتكلم عن المسلسل اللي انا بتابعه باهتمام طبعا الا لمّا ينتهى تماما ، وان كانت البدايات توحي بالنهايات .. البداية قوية جدا وانسانية جدا ، وكل واحد بيؤدي دوره بمهارة واتقان رهيب ، خاصة احمد العوضي اللي عامل دور هشام عشماوي ، ممثل ممتاز ودور تقيل ، بس لحد دلوقتي ماشي كويس اوي .. وامير كرارة دور عادي مش جديد عليه ولا علينا .. وكل طاقم العمل هايلين .. لكن التناول الموضوعي للمسلسل مش حينفع الا لما تنتهي حلقاته .

ومرة تانية .. شكرا جزيلا للإخوان على هذه المادة الحيّة اللي لو كنا عملنا قرود مكناش صورناها بالشكل ده .. لأننا نقلنا اللي عملوه بالحرف الواحد .. عشان اللي ميعرفش الاخوان يعرفهم .. واللي لسه عنده ذرة شك انهم اغبياء وارهابيين وقتلة .. يتأكد دلوقتي ويعرف احنا كنا فين .. وبقينا فين!!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: