الإثنين , يوليو 13 2020
الرئيسية / ثقافة وفنون / ابطال حقيقيون في  دراما رمضان.

ابطال حقيقيون في  دراما رمضان.

كتب :خالد عاشور

من الملاحظ في دراما رمضان هذا العام أن البطولة ليست بمساحة الدور.. فقد تفوق فنانين لم يكونوا هم ابطال العمل.. ولكنهم استطاعوا خطف الكاميرا وعيون وقلوب المشاهدين بادوراهم وصدقهم.

1- الفنانة مها نصار في مسلسل “الفتوة” .. في كل سنة بتزيد خبرة وتألق.. لكن في الفتوة كانت مختلفة فعلا.. مختلفة في انها بتمثل بطبيعتها دون الحاجة للافورة والتصنع والمكياج.. مساحة الدور ساعدتها انها تبين قدرتها في التمثيل..مقنعة جدا في معايشة الفترة دي من تاريخ الفتونة.. مها نصار بتثبت انها فنانة قوية ومختلفة ولها خصوصية لا تقلد أحد.. غير انها بتمتلك وجه مصري جميل واصيل بسماره وروحه.. ومن الفنانين اللي مش بيميلوا للمكياج.. وده بيزيدها حقيقة وقرب لعين وعقل المشاهد.
2- الفنانة القديرة انعام سالوسة في مسلسل (الفتوة) حاجة كده عظمة.. عظمة التمثيل والخبرة.. كوميديا معجونة بدراما.. انعام سالوسة فاكهة مسلسل الفتوة.
3- جهاد عصام و غفران محمد (سكر) وجهين شباب ظهرو في الفتوة.. كان لهم حضور وقبول كبير.. رغم مساحة الدور الصغيرة
4- الفنان محمد علاء في مسلسل البرنس في دور (ياسر).. من فترة متابع محمد علاء.. فنان مختلف.. الميزة فيه انه متأني وطالع السلم بهدوء.. مختلف في طريقته.. مختلف في اداءه.. في الشر ممتاز.. الشر المعجون بخبث.. بعجز.. بس كله لؤم وهدوء الثعبان وتلون الحرباية.. وفي الرومانسية بيمثل بدون محن وسوهوكة ولا افتعال.. فنان حقيقي وقدر يثبت نفسه.. ولسه هاسثبت نفسه اكتر لأنه فعلا بيذاكر ويتعلم وبعيد عن الغرور.. الغرور بيقتل اي موهبة.. ومحمد علاء من الفنانيين اللي بيفكروك بفنانين زمان.. بيقبل النقد ويتعلم ويطور من نفسه.
5- الفنان أحمد فهيم في البرنس في دور (رأفت) كمية الصدق اللي بيؤديها والفن على طبيعته بيخليك تتخيل ان الدور ده لو معملهوش أحمد فهيم هايكون ثغرة للمسلسل.
6- أحمد زاهر في البرنس في دور (فتحي) .. تخيل كمان احمد زاهر لو معملش الدور ده.. كمية الصدق وخاصة في حلقات التلت الثاني.. الأول كان بيزعق كتير.. بس شخصية كارهه لكل حاجة زيه تقدر تقول ان فعلا دي سيكلوجيتها.. دوره عامل حالة.. وللاسف فيه نوعيات من البشر فتحي في نفسها.. الواقع اشد قبح من التمثيل.
7- رحاب الجمل في مسلسل البرنس.. من جمال دورها مع اني متابعها من زمان.. بس كمية السواد اللي جوة نفسها وقدرت تعبر عنه بتمثيلها وصدقها يخليك تكرهها.. والفنان اللي يكرهه الناس من صدقه في التمثيل بيكون فنان ناجح جدا.. ورحاب فعلا كانت ناجحة انها تكرهه طوب الأرض في شخصيتها ودور (عبير).
8- أحمد داش في البرنس.. رغم ان مساحته صغيرة بس عامل دور حلو وموهوب.
9- روجينا في البرنس دور (فدوة) عظمة على عظمة حقيقي.. شخصية مركبة مريضة بماضي من الغدر والخيانة والمشاكل النفسية وعدم الثقة.. قدرت تعمله روجينا.. يبدو انها بركات صاحب الفضل.. الوحيد المخلصه له في كل الغدر اللي بتعمله.
10- الفنان محمد عبد العظيم في مسلسل ب100 وش. دور سامح الموظف المرتشي الفاسد.. شخصية رغم بساطتها لكن فيها الخير والشر.. الخبث والطيبة.. الجبن والشجاعة.. حاجة كده ترجعك لنجيب الريحاني خليط من والميلودراما على ال(Black comedy) على (farce comedy).. محمد عبد العظيم فنان حقيقي.
11- الفنانة دنيا ماهر.. دي بقي تستحق لقب خليط بين أمينة رزق على عبلة كامل.. قادرة تنكد عليك وتضحكك في نفس اللحظة.. في النكد متتوصاش وظهرت في سجن النسا.. وفي الكوميديا في طلعت روحي… طبيعية وحقيقية.
12- اسلام ابراهيم مفاجاة السنة دي وممثل قدر فعلا يثبت نفسه.. واتمنى منه انه يستغل نجاحه ويدور بهدوء على دور يناسب امكانيته ويتنوع في الأختيار.. المخرجين هايحاولوا يصبوه في نفس قالب شخصية ب 100 وش او يستثمروا الشخصية ويكرروها.. اللي جاي قدامه من الأختيارات هايكون صعب.. اتمنى يستغل الفرصة واظن انه ذكي هايعرف يحافظ على نجاحة ويتعلم من اللي سابوا نفسهم للتقوقع في شخصية واحدة بتكون نهايتهم سريعة.
13- شريف دسوقي.. رغم اني متابعه ومش مستغرب لنجاحه لأنه فنان فعلا مختلف.. اي فنان مسرح بيكون مختلف.. دوروا في المسرح فيه غيلان تمثيل.. المشكلة المخرجين دايما بيميلوا للنمطية ومساحة آمان لهم وحبس اي نجم في قالب معين.. كاملة ابو ذكري في شخصية سباعي طلعت عفريت شريف دسوقي من القمقم.. شريف دسوقي وبعد ب 100 وش هايكون فعلا في اختبار صعب.. اتمنى يوفق فيه ويحافظ على نجاحه.
14- لؤي عمران له ادوار كتير معلمة مع الناس أهمها في دور مدمن مع نيللي كريم في مسلسل تحت السيطرة.. كان من الأقناع انك لا يمكن تشك انه مش مدمن.. وفي مسلسل 100 وش.. عمل دور روعه كمادة خام للرخامة واللزوجة والغتاتة.. لؤي كمان كوميديان شاطر.. وشاطر جدا.
15- اسامة ابو العطا في دور المحامي المصلحجي .. دور رائع.. مبسوط بخفته وجماله وسهولة تمثيله.. ممثل بيمثل بدون حزق او افتعال.. بيمثل وهو سايب نفسه للشخصية.. خبرته ودراسته للاخراج وكمان مع كاملة ابو ذكري بتشوف منه اجمل ما فيه من فنان.. اسامة دوره معلم مع الناس ويستحق الاشادة والتكريم.
16- الفنان مصطفى درويش دوره فعلا مفاجاة.. ايه الشطارة دي في الكوميديا.. هو مشارك مع الفنانة يسرا في مسلسل خيانة عهد بدور جاد.. عاملة حلو جدا كزوج صبور وانسان مخلص.. عاملة بدون حزق او افتعال وتصنع.. والغريبة في الكوميديا عامل دور تحفة في 100 وش
17- علا رشدي (ماجي) وزينب غريب (رضوى) الكريز بتاع المسلسل.. علا رشدي بنت الطبقة الأرستقراطية مع زينب غريب الشعبية عاملين دويتوا جميل وكل واحدة بتعزف في منطقة اجادتها بروعة.. مسلسل ب 100 وش فيه شخصيات كتير حتى لو ظهرت في كام مشهد سابت علامة زي (نجلاء يونس) موظفة السجل المدني.. تلميذة وامتداد الفنان القدير أحمد كمال.. كمان صدقي صخر صديق عمر والفنانة سارة التونسي.. اللي لا يمكن تعرف من لهجتها انها تونسية.. دي مصرية وممثلة شاطرة كمان.. لها دور كمان في ليالينا 80.. المسلسل طلع طاقات ناس كتير وبين قدراتها الحقيقية تحت قيادة مخرجة لها رؤيتها وتقدر تطلع اجمل ما في الممثل.. مبتسبهوش لنفسه والإيجو عنده.. كاملة ابو ذكري استاذة حقيقية.
18- رنا رئيس في مسلسل ليالينا 80.. بنت اياد نصار وغادة عادل.. عاملة دور حلو.. يمكن من الأدوار الجميلة والمتميزة في المسلسل.
19- الفنان دياب في مسلسل فرصة ثانية .. يمكن الشخصية الوحيدة مع الفنان محمد جمعة اللي كانت ادوارهم مختلفة بعيد عن ايقاع المسلسل والسيناريو والأفورة.
20- خالد انور في مسلسل خيانة عهد عامل دور حلو جدا دور جديد على خالد انور..ومعاه هنادي مهنى.. هنادي كمان عاملة دور حلو في الفتوة… والجميل كمان في دوره الفنان الشاب تيام قمر.

ولسه فيه ناس تانية عاملة ادوار حلوة.. هاتكلم عنها .. دول فعلا كانوا صادقين ومختلفين.
الخلاصة ان فيه فنانين رغم انهم مش نجوم صف اول ولا شايلين مسلسلات باسمهم.. لكن تفوقوا على نفسهم واثبتوا نفسهم بجدارة.. والأختيار قدام كل واحد منهم في اللي جاي اكيد هاتكون صعبة لو عايز يحافظ على نجاحه.. وزي ما بيتقال.. الوصول للقمة سهل.. الحفاظ عليها هو اللي اصعب.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: