الثلاثاء , يوليو 7 2020
الرئيسية / رؤى ومقالات / احمد عفيفي يكتب : البرنس .. كلاكيت عاشر مرة

احمد عفيفي يكتب : البرنس .. كلاكيت عاشر مرة

سيبك من كل الكلام اللي احنا عارفينه واللي بنكرره كل سنة
.. من تعليمه الصياعة لعيالنا وان ناس كتير يتتأثر به وانه ساعد على انتشار البلطجة في الشارع المصري .. انا مش جي اتكلم على ده دلوقتي .. انا عايز اتكلم عن ممثل مينفعشي غير في دور واحد ، لو جرّب غيره حيفشل.

ندخل على طول على ” البرنس ” ونفتكر حبيشة في” ابن حلال ” .. ونرجع سنتين للاسطورة وزلزال .. التيمة الرئيسية ايه ؟ ظلموه .. حبسوه .. نفخوه .. طلع من السجن وقالك حقي برقبتي .. هو كده .. مينفعش الا كده ، ملامحه .. صوته .. تكوينه الجسماني .. لايمكن يخليك تتخيل انه دكتور او مهندس او محامي مرموق او صحفي له شأن .. يا راجل ده انا اقسم بالله مش متخيل اشوفه لابس بيجامة شيك ونظيفة.

والبرنس اللي عامل اعلى نسبة مشاهدة بين المسلسلات .. حدوتة متعادة شوفناها بدل المرة مليون .. تيمة الانتقام اللي اتعمل عليها افلام كتيرة جدا .. امير الانتقام لأنور وجدي وامير الدهاء لفريد شوقي وحديثا دائرة الانتقام لنور الشريف والمرأة الحديدية لنجلاء فتحي ..فكرة الانتقام من اللي ظلموك.

………………

اولا .. شوفنا رضوان البرنس في اول لقطة وهو بيبوس ايد ابوه وبيستسمحه انه يسافر الامارات يعمل قرشين ويكبّر الورشة .. يقوم ابوه يقول له : معقولة يارضوان تسيب ابوك .. ده انا يابني كل اعتمادي عليك.
ولا يهمك يابا ” مع أول دمعة تنزل من عينه الشمال عشان ختنزل كتير ” ويقوم مقطع الباسبور : خلاص يابا .. مفيش سفر.
الراجل مات .. وفتحي اخوه اجتمع بالعيلة كلها : انا قررت نبيع البيت والورشة .. يقوم رضوان افندي بمنتهي السماجة اللي لحد دلوقتي مالهاش اى لازمة وبنبرة صوت سمعناها قبل كده من حبيشة وزلزال ورفاعي الدسوقي بتاع الاسطورة : مفيش حاجة حتتباع .. ابوكوا كتب كل حاجة باسمي .. اللمبة اللي انت قاعد تحتها بتاعتي وباسمي.
السؤال للمخرج المؤلف : من الناحية الدرامية .. لو كان رضوان قالهم على وصية ابوهم بالراحة وان كل واحد حياخد حقه لمّا ينصلح حاله .. كان حيجرى ايه ؟ كانوا برضه حيحقدوا عليه ونكمّل الصراع للأخر .. بس كان زاد تعاطفنا مع رضوان وقلنا في نفسنا : ماهو عمل اللي عليه ، بس همّا كفرة ولاد ستين في سبعين!!

قتلوا مراته وابنه وحاولوا يقتلوه في المستشفى .. ولفقوا له تهمة وسجنوه .. ماشي .. ايه بقى المرافعة بتاعت وكيل النيابة اللي قالها وكأن رضوان قتل اهالي الحي كله بالكلاشينكوف ، مش سرق 70 الف جنيه من بيت اخوه!
طيب .. اجبروه على توقيع مبايعة ، وبناء عليه باعوا البيت والورشة .. ايه لزوم رمي بنت رضوان في الشارع .. ايه الاستفادة الدرامية من فعل خسيس زي ده الا اني افضل اتفرج على 6 حلقات وهو بيدّور على بنته؟ كان عادي جدا يسلموها لأهل امها ، لكن ازاى .. أمال رضوان حيفضل مشغول عنهم بإيه وحنكمل 30 حلقة ازاى؟
طيب بمناسبة البنت والراجل اللي خدها وربّاها .. هاتولي مبرر واحد انه يتمسك بيها بعد ما عرف ان ابوها عايش ، وهو مش محروم م الخلفة بحيث نتعاطف معاه شوية في تمسكه بيها .. مفيش غير أفورة في السيناريو والاحداث والمواقف.

…………………..

نروح لفتحي اللي هو احمد زاهر : مين قالك وعلّمك ان الشرير بيعمل كده .. مش غلطتك .. دي غلطة مخرج ساذج .. كان لازم يخليك تتفرج على ممثلين عظام قاموا بدور الشر .. بس مكنوش بالعبط بتاعك ده وبملامح وشك والجز على اسنانك في الرايحة والجاية واللزمة بتاعتك ” وعرش رينا ” .. لا خلتني اكرهك من شدة اتقانك للدور ، ولا اتعاطف معاك كممثل اى كلام منتش أد الدور .. كل اللي انت نجحت فيه انك خلتني أقرف منك ، وبالمرة من مراتك فدوي .. الست روجينا اللي أدت دورها بمنتهى السماجة والغباء .. مشوفناش منها غير شفايف حمرا في كل وقت وسنان لسه واخده وش نقاشة معتبر عشان تبقى ناصعة البياض!

………………….

وعيلة ايه دي اللي عندها عيل مراهق فاتح مشروع ومدمن هيروين وقاعد مع واحدة معرفناش ان كان ليها اهل ولا مقطوعة من شجرة .. وبعدين في الأخر طبعا حيتوب على ايد اخوه رضوان .. وكان رضوان سايبه ليه من الاول والمفروض انه أرجل واحد في اخواته .. حد مقتنع باللي شافه ويقولي انت غلطان؟

…………………..

الجديد الل يانا متوقعه في المسلسل ان رضوان لا حيقتل ولا يرجع السجن .. فتحى حيقتل اخوه ياسر لما يعرف ان فدوى حامل وهو مبيخلفش ، وبالمرة ياريته يجز رقبة فدوي ويخلصنا من تقل دمها وادائها الباهت اللي لا انت عارف ان كانت مرة شرشوحة ولا ست هانم .. ولا واحدة سكسي ع الأخر والرجالة مقطعين بعضهم عليها ، وهى في الحقيقة متسواش في سوق الستات اللي على حق ، بصلة !
رضوان حيتجوز علا ” الوجه الوحيد المريح في المسلسل كله ” واخته حترجع لاخو علا وعادل اخوهم حيبقى ميت فل وعشرة ، وعبير تموت محروقة وجوزها معاها في ستين داهية .. اما عبد المحسن فممكن ينتحر من شدة احساسه بقلة القيمة والمهانة.
وتوتة توتة خلصت الحدوتة ونشوفكم السنة الجاية مع محمد رمضان في دور جديد نوفي عليه عمره ماعمله قبل كده .. بس برضه حيتظلم ويتسجن ويخرج ينتقم وهلم جرا .
مفيش فنان كبير يبني تاريخه الفني على دور وشخصية واحدة ، بس الحقيقة عذرك الوحيد انك متعرفشي تكون غير حبيشة ورفاعي وزلزال واخيرا رضوان البرنس.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: