الأحد , أغسطس 9 2020
الرئيسية / رؤى ومقالات / الشاعر سعيد شحاتة يكتب: ياناااس.. كورونا ما خلصتش

الشاعر سعيد شحاتة يكتب: ياناااس.. كورونا ما خلصتش

راجل محترم وأولاده نازلين من توكتوك… فالراجل بص على القهاوي لفت نظره إن كل الناس بتبص له باستغراب… بص حواليه لقى ولاده لابسين كمامات… فتقريبًا افتكر إنه حاطط كمامة… بص للي قاعدين بخجل شديد وهو بيحاول يتفادى العيون اللي بتراقبه… ومد إيده وعنيه في الأرض وكأنه عامل عاملة… وشال الكمامة بمنتهى الهدوء… وحطها في جيبه بارتباك ملحوظ… وبص للناس اللي على القهوى بأدب جم… ورمى عليهم السلام ومشي…
طبعًا واحد من ولاده خد باله من الموقف فخلع الكمامة والباقي ما اهتموش وكملوا بكماماتهم… وكأنهم مش واخدين بالهم من الناس اللي بيضحوا بأعمارهم على القهاوي ومستكترين في غيرهم الالتزام والخوف على صحتهم…
الراجل رمى السلام وفات زي أي موقف عابر في الحياة بيفوت… مر والعيون مرشوقة فيه زي السهام… مش عارف ردوا عليه السلام واللا لأ وهو كمان ما اهتمش… بس اللي أعرفه إنه اتجلد من ألسنتهم اللي ما بطلتش كلام عليه ولا على أي محترم زيه ملتزم ماشي بكمامة للأسف الشديد…
قبل الموقف دا بيومين… وفي نفس المكان… كان اتنين من اللي قاعدين دول بيهزروا مع بعض… واحد شاري (ميدو) وقاعد يلحس فيها والتاني بيخطفها منه ويلحس من نفس المكان اللي لحس منه صاحبه… ويديهاله فيكمل لحس… وكأنها ملحسة…
ودا طبعًا مش جريمة ولا كارثة من وجهة نظرهم… بس الناس اللي ماشية بكمامة هي اللي تستحق البحلقة والمطاردة بالعيون والجلد بالألسنة… والتريقة بصوت عالي إن لزم الأمر…
يا جماعة سيبوا الناس في حالها… اقعدوا على القهاوي واتمرجحوا على الكراسي وخمسوا الشاي من كباية واحدة… والحسوا الميدو والجيلاتي مكان بعض براحتكم… أنتم أحرار… بس يا ريت ما تجبروش غيركم على الشرب من نفس الكباية اللي بتشربوا منها… ولا على لحس الميدو مكان زميله عشان مش ناقصة…
…..
يا نااس.. كورونا ماخلصتش
…..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: