الخميس , أغسطس 13 2020
الرئيسية / رؤى ومقالات / احمد عفيفي يكتب : حب ايه اللي انت جي تقول عليه

احمد عفيفي يكتب : حب ايه اللي انت جي تقول عليه

تعرفوا الشاعر الغنائي عبد الوهاب محمد ؟ .. سامع كتير من جيل الايام دي مستغرب الاسم وميعرفوش.

بس انا وكتير من جيلي نعرفه.. انا تحديدا سمعت له تتر مسلسل قديم اسمه ( ناعسة) بتغنيه مها صبري.. بتقول فيه : ليلي ياليل ياعين.. عشنا نبين زين ونقول من الكفين للمستخبي بان.. واما رمانا هواه ماعرفنا جانا ولا فين ده كله كان.. الاسم نظرة عين والفعل دابوا اتنين .. ناعسة مع حسان.
كنت وقتها في الإعدادية تقريبا .. وعجبني تعبير جديد نوفي في نفس الأغنية بيقول الحب اسمه الحقيقي القسمة والنصيب.
………….

تفوت السنين وتعدي وام كلثوم تغني حب ايه .. ويطلع اللي كاتبها هو نفسه صاحب الحب اسمه الحقيقي القسمة والنصيب.
………….

وصلت للمعنى ده ازاى ياعبقري؟
كنا قاعدين على قهوة ريش وسط البلد .. انسان بسيط جدا ومتواضع جدا .. وحبيب درجة أولى.

بابتسامة لاتفارقه طوال القعدة : اى معنى .. حب ايه ولا القسمة والنصيب؟
قلت : التاني طبعا.
رد : وآلله ما اعرف جات ازاى .. زمان وانا عيل مراهق حبيت بنوتة زي القمر وجالها عريس فأهلها وافقوا .. ولقيتها بتواسيني وتقولي : متزعلشي.. الجواز قسمة ونصيب.
فقلت لها : الجواز قرار .. ممكن تقبلي وممكن ترفضي .. لكن حبي ليكي هو القسمة والنصيب.. قدر ومكتوب ومفيش منه فرار .. مينفعش اسأل نفسي : احب البت دي ولا محبهاش.. مش بمزاج أمي .. وراح يضحك بعفوية وخفة دم : قال متزعلش قال .. بنت كلب.. متعرفش ان من ساعة ما تولدت وانا مكتوب لي احبها هى بالذات دونا عن بنات العالم.

……….

أكمل : بس انا مبسوط انك فاكر مسلسل ناعسة .. ناس كتير اوي زمان كان يستمتعوا بالكلام واللحن لكن ميعرفوش غير اسم اللي بيغني.

قلت له : بس بعد كده كل الناس عرفتك لما غنت لك ام كلثوم حب ايه.

– اسكت ياعم احمد .. لو احكيلك حكاية الأغنية دي حتموت م الضحك.

… احكي يا استاذ.. الضحك النهارده بقى بفلوس .. شايف الناس ماشية مبلمة ازاى كأن مات لها ميت؟

– مكنش يخطر على بالي لحظة ولا كان حلم من احلامي ان ام كلثوم تغني لي غنوة .. وكذلك بليغ حمدي.
قاطعته: انتوا كنتوا أصحاب اوي انت وبليغ؟

– أصحاب دي كلمة قليلة .. مكناش بنسيب بعض إلا وقت النوم .. وساعات إما أبات عنده او يجي هو وينام عندي .. وفي مرة واحنا الاتنين ضاربنا السلك ومفلسين قال لي : متشغل الجمجمة يا هوبا.. مكلناش ربع كباب من يجي ست أشهر .. فقلت له وانا بضحك : معايا سميط وبيض وجبنة رومي .. فرد : وحياة خالتك مش طالبة هزار .. شوف اى حاجة الحنها ونديها لمها صبري او فايزة احمد.
قلت له : حب ايه اللي انت جي تقول عليه .. انت عارف قبلا معنى إيه.

يا ابن الجنية .. حلو المطلع أوي.. نديها لمين تفتكر ؟ .. اى حد يابليغ.. انا زيك .. وحشني الكباب والكفتة.

……….

زمان يابو حميد كنا بناخد ع الأغنية عشرين جنيه.. منعرفش المائة او الألف.. مكنوش في قاموس البنكنوت بتاعنا .
وفاتت كام سنة وانشغل بليغ مع عبد الحليم وعمل له ( تخونوه ) .. قامت ام كلثوم سمعتها واتكيفت اوي.. وسألت : مين اللي لحن الغنوة الحلوة دي.. قالوا لها: ملحن صغير اسمه بليغ حمدي.. وحسب ماسمعت بعدها من واحد قريب جدا من الست .. ردت: صغير ؟ امال لو كبير حيعمل إيه.. هاتوا لي الولد ده.

……….

وراح يكمل وانا مشدود اوي لكلامه: اضحك بقى على عمك بليغ.. كلموه في التليفون وبلغوه: الست عايزاك بكره الساعة ٩.
رد ست مين ؟ ( كان بليغ يعرف ستات كتير ومقضيها مهيصة ).. قام رد : انا مابروحش لستات.. هما اللي بيجوني.
رد عليه الراجل: الست ام كلثوم ياعم روميو هى اللي عايزاك بكره في فيلتها الساعة ٩. اوعى تتأخر.. وقام قافل السكة.

……….

بليغ كان نهاره ليل وليله نهار.. بينام الساعة ٨ الصبح.. وافتكر ان الست عايزاه ٩ بالليل.. فطبعا نام زي الباشا.. على مايصحى ويوضب نفسه ويروح لها.

………..

فات الميعاد وبليغ نايم بيشخر والست اتجننت.. تتصل بنفسها ميردش.. وفييين بعد ٧ مساء رد : مين معايا؟ .. ازاى يا استاذ اطلبك في ميعاد ولا تجيش.
ميعاد ايه وانتي مين؟
… انا ام كلثوم .
بليغ مش مجمع لسه ومش فايق : ام كلثوم مين .. مش ناقصة هزار وحياة ابوكي.. انتي مين وعايزة ايه؟
– هزار ايه يا جدع انت.. انا ام كلثوم وكان بينا ميعاد .. مجتش ليه؟
بليغ اتخض ومش مصدق ان ام كلثوم بتكلمه بنفسها فرد : انا بجهز ياهانم وجيلك.. مش الميعاد ٩؟
…. ٩ الصبح يا افندي مش بالليل.. مستنياك بكره .

……….

بليغ فضل صاحي لحد ماراح لها تاني يوم .. واستقبلته زي ماقال لي بحفاوة : انت ملحن شاطر.. سمعت لك تخونوه .. عندك حاجة حلوة ليا؟

………..

بليغ منبهر ومجرد قعدته مع ام كلثوم فوقته ونسيته النوم: عندي ياست.. ممكن عود.
بصوت ضاحك : هاتوله عود.
قام قاعد على الارض وفارد رجليه : حب ايه ايه اللي انت جي تقول عليه.. انت عارف قبلا معنى الحب ايه.

ام كلثوم : استنى استنى.. انا حاغني ولا ح اتخانق؟!!
بس الطلعة حلوة .. كمل ياولد ياعفريت.
………..

يقول لي عبد الوهاب محمد وانا متسلطن من الحكاية : لما بليغ قال لي مصدقتوش.. ام كلثوم حتغنى للعبد لله.. زغرتي ياما.
سألته : وقابلتها يا استاذ؟
تخيل لأ .. الأغنية اتلحنت واتغنت.. ومطلبتش تقابلني.. بس سألت بليغ : اما هو موهوب كده .. محدش سمع عنه ليه؟ .. فرد عليها : عشان لسه ماغنتيش له ياست!

………

بعد حب ايه لقيتها بتطلبني وعايز حاجة تانية.. وكانت انا وانت ظلمنا الحب.
قريتها وطلبتني وقالت لي : انت كاتب وضاع الحب ضاع مابين عند قلبي وقلبك ضاع.
رديت : مضبوط ياست.. فردت : حتشيل الياء من قلبي والكاف من قلبك.
قلت : مش فاهم حضرتك تقصدي إيه.. فقالت: حتبقى مابين عند قلب وقلب ضاع .. لانه لو كان قلبي فعلا وقلبه فعلا مكناش ضيعنا أجمل لحظات عمرنا.
فقلت منبهرا بتعديلها: كده أجمل فعلا .. تحياتي ياست الكل.
…………

تعرف يا فنان .. انت لخصت حال الأنثى اللغز في كلماتك لسميرة سعيد .. إحكى ياشهر زاد .. احكي لشهريار.. إشغلي له ليل لطلوع النهار.. حيري له حاله وغيري له باله.. خلي عقله دايما في حالة انبهار.
ثم سألته: هى دي المرأة يا استاذ .. حللتها م الأخر.
رد ضاحكا : مطلعين ديك ابونا .. لكن برضه بنحبهم ولاد الهرمة!!

………..

آخر سؤال بقى وشخصي جدا : صحيح انت بتحب لطيفة التونسية ولا دي إشاعة؟

فرد : ومين يقدر يشوف لطيفة وميحبهاش.. دول جابوا أجمل بنات الدنيا وضربوهم في خلاط.. فطلعت لطيفة.
ثم وقد خفتت ابتسامته قال لي: آهى هى دي اللي يليق عليها: الحب اسمه الحقيقي القسمة والنصيب.

للدرجة دي يافنان؟
فرد : للدرجة دي ياصاحبي!!!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: