ريهام عرفة تكتب : أم كلثوم ، الأمل والكراكيب !

تم النشر فى مع 0 تعليق اضيف بتاريخ : 05/01/2017 الساعة : 10:40:44


سمعت أم كلثوم وهي بتغني "الأمل"؟..

بتبتدي الأغنية بالكلمة دي بس "الأمل" وتسكت..... وترجع تقول "الأمل" وتسكت..

أهو أنا بقى كل ما حد يجيب سيرة الأمل أفتكر أم كلثوم وهي بتقول "الأمل" واللحن يكمل قائلا تيرا را را را.

في ناس بتعتبر الامل شعلقة مالهاش لازمة وبتضيع الوقت... لكن انا من الناس باحب أساير الميل الجماعي اللي بيعتبر الأمل حاجة حلوة.... بس احيانا ...احيانا بس و في بعض المواقف القليلة جدا... باعتبر إني منتصرة لما أهزم الأمل واتخلص منه تماما . ما هو يا تحققه يا تتخلص منه... إنما بين البينين ده بيقصف العمر ويدبل الأيام.

لكن في اغلب الاحوال انا ماباعرفش اتخلص من الأمل.. بافضل متعلقة بالحاجة اللي كل الشواهد بتقول إنها عمرها أبدا ما هتحصل.. انا بأة ياتجاهل الشواهد دي وياتشعلق في الأمل..عارفين ليه؟ علشان بالنسبة لي التعلق بالامل هو التعلق بربنا...ربنا اللي مش محتاج دليل او شواهد علشان يحقق اللي احنا كبشر بنتخيله مش ممكن...تعلقي بالامل هو الوسيلة اللي بيها باتوسل الي الله انه يحقق اللي يمكن باين انه مش ممكن...البعض بيعتبر ده نوع من السذاجة او اغفال عن الواقع و التمسك بالاحلام....فليكن....انا ساذجة و متمسكة بالاحلام....حد شريكي؟

لكن برضه ارجع و اقول انه احيانا و في بعض الحالات ممكن يكون التخلي عن الامل في شيئ ما قرار متعمد لمجرد التخلص من شوية كراكيب في المشاعر الواحد بيحتاج يتخلص منها زي ما بيتخلص من الكراكيب في بيته و حياته ...و الحل الوحيد هو التخلص من المسبب الرئيسي في الكراكيب دي, الا و هو "الامل" تيرارارارا.

لكن ايه اللي الواحد لازم يتخلص منه بعد ما يتخلص من الامل في حاجة؟ الندم طبعا. إوعى تبص وراك وتدي فرصة لأفكارك تروح وتيجي وتخلي الندم يتسلل في مشهد درامي مؤثر ممكن يخليك تعيط أو تتهور كفاية فتدور على تليفون بياع الروبابيكا.

يا رب.....انا املي دايما هو امل فيك ... ثقة فيك و انا موقنة انك مش بتخيب رجاء من يسعي اليك ...و علشان كدة بارجوك انك تبعد عني ما تراه انت شرا لي حتي لو ظننته انا خيرا.


349 مشاهدة