مها الجميعي تكتب : إبحث فى داخلك عن طريقة تزين بها عقلك !

تم النشر فى مع 0 تعليق اضيف بتاريخ : 05/01/2017 الساعة : 2:09:55


الممثله أمينه خليل عرضت فستان الفرح فى ديفليه هانى البحيرى الاخير ..اختيار موفق بشده ..تاملت ملامحها وهى تقترب على المسرح والتصفيق يعلو لها اكثر مما يعلو للفستان المبهر : مناخيرها محتاجه نوز جوب ..عينيها عاديين جدا  .. حواجبها مش طبيعيبن حتى شعرها غالبا اكستنشن .. تفاصيل وجهها اكثر من عاديه ولا شىء فيه مبهر بالمره ...  حتى مقاييس جسدها- مش ممتلئه - ولكنها ليست مثاليه ..بس هى على بعضها كده جميله .. هى على بعضها كده تجذبك  :  تعلو وجهها نظره خجل وحياء تجذبك اليها ..الحياء يرسل عطرا لا تخطئه الروح فيجذبك ..  يخلق نوع مختلف من الحاذبيه ..ابتسامتها ورقتها تبهرك فتغنيك عن التركيز فى تفاصيل الوجه .. رقتها تزيدها انوثه فتخطف قلبك ... ادوارها توحى بانها شخصيه عاطفيه عاقله خجوله وطيبه  فأصبحت تلك هى مخيله الناس عنها .. لهم حق الشباب يعملوها ايقونه لفتاه الاحلام ...لهم حق يعشقوها.. هو فيه احلى من كده يعشقه القلب ؟ لو ابنى بيتجوز ما اتمنالوش اكتر من كده. .. ظلموا الرجال لما قالوا عليهم بيجروا ورا جمال الشكل ..وظلموا الستات لما اقنعوهم ان الجمال هو جمال الملامح والجسم فأصبحت المرآه هى الشغل الشاغل لكثير منهن .. الجمال المقترن  بفراغ الروح وتفاهيه العقل عمره قصير .... العين تنجذب للجمال بسرعه وتمل ايضا بسرعه .. اما الروح فيسحرها العقل والقلب يسحره جمال النفس  وده عمره طويل ..  غلطانه من تهتم بالمرآه اكثر من اهتمامها بعقلها وروحها  ..

الشخص اللى جواه فاضى( رجل او امرأه) ومعندوش شىء ذات قيمه يقدمه  للى حواليه هو اللى ببحط الحواجز  و المظاهر والغرور  لاضافه هيبه لنفسه علشان يحاول يلفت النظر اليه  ... لكن المبهرين فعلا واللى جواهم معانى وقيم قويه وحلوه بيبقى الوصول ليهم سهل  وفهمهم سهل وجوهرهم واضح رغم انه ممكن يكون صعب ..  لانه متكلف !

طبعا إن الله جميل يحب الجمال فالاهتمام  والمحافظه علي الشكل والمظهر  من تدهور الزمن مهم ولا بد منه ولكن ليس ابدا على حساب كمال العقل وجمال الروح والقلب .. كل مدى العلم بيطلع لنا حلول لمحاربه تجاعيد البشره وعوده شباب الملامح .. فهل من حلول لعوده شباب الروح ؟ هل من علاج لشروخ الزمن .. هل من دواء لازاله بصمات الحياه الثقيله وتنقيه النفس المتعبه ؟ اخترعوا مساحيق وفيلر وماسكات وغيره ، لكن لسه ما اخترعوش طريقه تجمل بها روحك ولا طريقة تزين بها عقلك.  الفالصو والتمثيل والخواء والتكلف والادعاء و مساحيق العقل والروح بتنكشف مع اول اختبار بسيط فى الحياه ومع اول مواجهه مع اللى حواليك .. كله بينكشف ولو بعد حين .. تجميل الوجه  والملامح تبدا مع زوال الشباب  اما تنميه الروح والعقل فهى ممتده ومستمره على مر حياتك  .. عقلنا وروحنا اهم بكتير من ملامح الوجه ولياقه الجسم ولازم نحميهم من الشيخوخه زى ما بنشتغل على لياقتنا وملامحنا فالاتنين  محتاجين عنايه ومجهود ... الابتسامه والضحكه واللحظه الحلوه والمصالحه مع النفس والسلام الداخلى كلها ادويه ببلاش بس بننساها ..تحييه كبيره لكل من وازن بين جمال قلبه و وروحه وعقله ثم ملامحه  !

يللا قوموا يا ستات جه ميعاد الكوافير .. وماسك الزبادى والبخار  وغيره


1191 مشاهدة