الإثنين , ديسمبر 10 2018
أخبار عاجلة
الرئيسية / رؤى ومقالات / احمد عفيفي يكتب : وادي ابراهيم عيسى مشي .. والحياة بقى لونها ” شفتشي

احمد عفيفي يكتب : وادي ابراهيم عيسى مشي .. والحياة بقى لونها ” شفتشي

فاكرين اغنية مدحت صالح اللي غنّاها في تتر ” سكة الهلالي ” من كام سنة .. كان بيقول ايه بقى : دي لا باظت ولا خربت .. ولا جابت جاز لامؤاخذة .. دي عيشة ظريفة جدا ، ولا في دماغ ضربت ولا حد بيشتكي لحظة .. ماشية والأشيا معدن .. عايشين في حرية .. زمن القيود اختفي .. أتحدي لو واحد .. يوم انضرب بالقفا .. والناس بتختشي.. ولا حد بيرتشي .. الله على الحياه بقي لونها شفتشي .
فعلا كل اللي قاله مدحت صالح من كام سنة اتحقق في يوم وليلة لمّا ابراهيم عيسى مشي ، لأ ولسه .. دي حتبقى ورد وفل وياسمين .. أصل ابراهيم عيسى كان بوذه نحس ، موّقف لنا المراكب السايرة .. اتارى الحكومة عندها حق ، لو كانت تعرف ان استبعاد عيسى وحرمانه من البرامج بتاعته حيحل أزماتنا بالسرعة دي ، كانت مشيته من زمااااان.
زغردي يا ام محمد .. صاحبك غار في داهية .. كان مسوّد عيشتنا ومفيش حاجة عاجبة أمه .. وام محمد ترد : قصدك مين .. الجدع ابو حمالات .. داهية تاخده مطرح ماراح .. تصدقي ياولية .. الراجل جوزي امبارح واحنا متخاصمين ومصدّره له الطرشة ، قال ايه جي يحك فيا ويقوللي سامحيني يا ام العيال ، قلت له مالك ياراجل ، ما انت كنت عامل 10 عنتر في بعض .. ايه اللي خلّاك تنخ تجيب ورا بالشكل ده .. يقوم يرد المدعوق : ماخلاص ياولية ابراهيم عيسى مشي وكل شىء حيبقى تمام التمام .. هو اللي كان سادد نفسي من ناحيتك .. خلاص بقى قومي هاتيلي لقمة ونيّمي العيال ، وحتشوفي عنتر على أصوله النهارده.
ونبي ايه .. تصدقي انك صادقة يا ام محمد ، الواد ابني عنده يادوب 4 شهور وبيلبس بامبرز ، الاقيه النهارده الصبح بيقوللي وسنانه لسه مطلعتش ، عايز اروح الحمام يامه زيكم ، عشان أوفر عليكم تمن البامبرز.
سبحان الله .. الراجل بقى عنتر مع جماعته ، والواد ابن الاربع شهور بيروح الحمام لوحده ، وكل ده لما ابراهيم عيسى مشي.
طيب ده بس على المستوى الشخصي بتاع العائلات البسيطة ، طيب ننزل الشارع كده ونشوف ايه اللي حصل فيه .. شايف البنزينة اللي هناك دي .. وشايف الراجل اللي نزل من العربية ، ايه ده ؟ ده بيبوس عامل البنزينة من بقه .. أأأأه .. افتكرت أصل البنزين بقى اللتر بـ 10 قروش بعد ماكان وصل لـ 4 جنيه ، والسولار بقى ببلاش والغاز الطبيعي كل ماتفوّل عربيتك تاخد مكافأة 100 جنيه .. هو ايه اللي حصل ياناس ؟ .. ايه ده .. انت متعرفش بجد ؟ .. والله العظيم ماواخد بالي .. مش ابراهيم عيسى مشي!!
رحت ناحية بنك من البنوك ، ودخلت وبصيت على لوحة العملات مصدقتش نفسي ، الدولار بقى بكام ياولاد ؟ .. نهار ابيض .. الجنية بقى يشتري 3 دولار .. ياجماعة انا في مصر ولا في الصين .. ده امبارح بس كان الدولار بعشرين جنيه ، يقوم تاني يوم الجنيه يركب ويدلدل رجليه ويذل أم الدولار ويضربه على قفاه ، لأ وايه .. الاقكي رجل أعمال عايز مبلغ كبير من الدولارات عشان صفقة جاية له من سنغافورة ، الاقيه ياحبة عين أمه بيسلم المبلغ بالجنيه للبنك والدمعة حتفر من عينه ، وبيقول للموظف اللي قصاده : انت عارف قيمة الجنيه ده ، كان على عيني أفرط فيه لكن للأسف الاستيراد بالعملة الصعبة! .. هو ايه اللي بيحصل ده ياجماعة ؟ .. انت نايم ياعمنا .. مش ابراهيم عيسى مشي!
رجعت البيت كأني رجعت بعمري 30 سنة لورا ، لقيت مراتي جايبة 50 كيلو لحمة و10 بطات و20 جوز حمام والفاكهة مقولكش .. فيه ايه ياستي ، وجبت الفلوس دي كلها منين ، 50 كيلو لحمة يامفترية والكيلو بـ 120 جنيه .. تقوم ترد : 120 ايه و200 ايه ، دي اللحمة بسبعة جنيه ، تعالى بس ناكل عشان عايزين ننزل بسرعة نشتري 3 شقق للعيال في الرحاب وكمان تلاتة زيّهم لعيال عيالنا ، ارد عليها وانا حتجنن : 3 شقق للعيال و3 لعيالهم ، كأنك بتشتري قمصان وبنطلونات ، تقوم ترد : شقق مرمية والشغل في كل حتة واللحمة بـ 7 جنيه وساعات نلاقيها بـ 6 … يا دين أمي .. هو فيه ايه .. ايه اللي حصل ؟ .. هو انت متعرفش .. مش ابراهيم عيسى مشي!
قاعد اتفرج ع التليفزيون لقيت خبر عجيب غريب : اثيوبيا اعلنت انها منعت استكمال سد النهضة ، وبعتت اعتذار رسمي لمصر تعترف فيه انها غلطت غلطة عمرها ورجعت في كلامها ، وأهون عندها ان شعبها يموت من قلة المياه ولا مواطن مصري واحد ميستحماش في البانيو وهو بيغني احلف بسماها وبترابها .. السد هو اللي خربها .. أسفين يامصر .. بجد اسفين .. اللي ميعرفك يجهلك! .. طيب عملتي كده ليه يا اثيوبيا .. ده الوفد السعودي لسه ماشي من عندك وكان بيبارك مشروعك .. تقوم ترد : أصل مشي من عندي وراح مصر في السر والخباثة .. طيب وايه اللي جابه مصر في السر يعني ، ترد اثيوبيا : هو انت متعرفش ؟؟ مش ابراهيم عيسى مشي ، .. طيب ايه دخل ابراهيم عيسى بالوفد السعودي اللي جه ومشي سرا ؟ .. والله اسأل اللي عندك : هما قالوا نضحي بالمولود عشان الأم تعيش .. مجتش على واحد .. العيال عندكم متعدش!!
نزلت بعد الغدا مشيت في وسط البلد لقيت ناس كتير اوي شايلين اعلام السعودية ، بحلقت في وشوشهم لقيتهم مصريين ، فيه ايه ياجماعة الخير ، يقوم واحد يرد عليا وابتسامته من ودنه لقفاه : مش مجلس الشعب قال ان الجزيريتين تابع السعودية والمحكمة حكمت بيهم للسعودية ، طيب وانتوا فرحانين ليه ؟ يرد عليا واحد تاني : هما قالوا لنا اضحكوا وافرحوا وانتو رافعين العلم السعودي في قلب مصر .. هما مين ياجماعة الخير ؟ .. كلهم بصوت واحد : ” اللي بالي بالك ” .. اللي بالي بالك .. قصدكم اللمبي؟ .. اسم الله عليك .. هو اللمبي.
مشيت وانا راجع للبيت عرفت فعلا ان ابراهيم عيسى مشي والحياة فعلا بقى لونها ” شفتشي ” !!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *