سها زكي تكتب : أوباما و دموع التماسيح !

تم النشر فى مع 0 تعليق اضيف بتاريخ : 11/01/2017 الساعة : 8:11:51

و يرحل أوباما بفشله الذريع  في انه ينفذ ولو جزء بسيط من خطة إدارته الأمريكية  في تقسيم مصر مُحملا بالدم و العار إلى مزبلة التاريخ !

يرحل ومعاه خيبة أمل وهو شايف بعينه مصر بتحارب وبتحقق انتصارات حقيقية على الأرض بشهادة العالم كله ..

يرحل بدموع التماسيح وهو يتباكى  لكي يكسب تعاطف ولو على احساس وهمي ان في حد لسه بيحترمه !

يرحل بهزيمة مدوية لهيلاري كلينتون - الراعي الرسمي للخراب العربي - وحتى الآن بيحاول يلزق الهزيمة لاستخبارات روسيا وتدخلها في النتائج بدون ما يشعر ان مجرد تلميحه لتدخل مخابرات دولة اخرى في شؤون بلده ان دي هزيمة اكبر !

يرحل أوباما الإرهابي الدموي .. ولكن ...

انتبهوا يا شباب مصر .. انتبهوا لأن اطماعهم لن تنتهي .. دول مجرد ماسكات بتتبدل ووشوش بتتغير .. لكن هدفهم واحد !

احنا جيل بيعشق بلده .. عشان كده قدرنا نصد قدامهم كل محاولات اهل الشر .. وبفضل ربنا وخوفنا على بلدنا مقدروش علينا ولا هيقدروا !

الخوف كله عليكوا انتوا يا شباب رغم ثقتنا فيكوا ..

اوعوا تخذلوا مصر ولا تخذلونا في اللي تحملناه وقولنا عشان لما تستلموا مننا الراية نبقى مطمنين .

اوعوا يتضحك عليكوا بشعارات وهمية ووش الطيبة اللي مستخبي وراه وش التعالب ..

اوعوا يرموا لكوا الشبكة مليانة فلوس وتروحوا لها وتطلع الشبكة شايلاكوا وشايله البلد حواها ..

اوعوا يضحكوا عليكوا بديموقراطية كذابة هم نفسهم ما بيطبقوهاش في بلادهم وشوفتوا اقرب مثال في تعاملهم مع احداث الزنوج الأخيرة كان بطريقة همجبة وقمعية وعنصرية ازاي !

أوعوا تنسوا ان دي مصر .. اوعوا تفرطوا فيها ..

أوعوا تنسوا اللي تآمروا عليها وضحكوا عليكوا وكانوا عاوزين يبيعوكوا ويبيعوها بالرخيص وربنا بيكشفهم كل يوم قدامكوا !

يا شباب مصر ..

حطوا مصر في قلبكوا وعينكوا .. عشان نقدر احنا بعد كام سنة ننام مطمنين .

اعرفوا تاريخنا وقوتنا عشان تقدروا انتوا تعرّفوا ولادكوا مين هي مصر الحرة الشابة القوية العفية طول الزمان !

اعرفوا الخونة اللي ابهروكوا ببريق العالم الغربي واستغلوا فيكوا حماس الشباب وهما بيبيعوكوا وبيتفاوضوا على التمن اللي هيقبضوه !

اعرفوا ان لو بلدنا مالهاش قيمة كبيرة .. مكانش زاد الاصرار كل يوم على هدمها بطريقة جديدة !

بصوا على الخريطة و شوفوا مصر ازاي  صامدة وسط دول ضاعت بالفعل بجيشها وشعبها ومؤسساتها وفي اجيال من الدول دي هتفضل عايشة على ذكرى ان كان لهم وطن في يوم من الأيام !

اعرفوا قيمة مصر وافتخروا بيها .. اسألوا في التاريخ مين هي مصر !

نحن مصر وكفى

المجد للثابتين

تحيا مصر يا ولاد مصر


2871 مشاهدة