ريهام عرفة تكتب : معسكر مصر السنوى للمذاكرة !

تم النشر فى مع 0 تعليق اضيف بتاريخ : 12/01/2017 الساعة : 12:57:52


مصر دلوقتي عبارة عن معسكر مساحته مليون كيلو متر مربع كله قاعد في البيت ما بين طالب بيذاكر وام بتذاكر عشان تذاكر للطالب واب بيحاول يستخبى من الام وهي بتذاكر عشان تذاكر للطالب..... في خطوات مهمة جدا الفترة دي..

١- ضرب الواد بالشبشب مش هيكون سبب في ارتفاع معدل ذكائه.. ده هيعيط ويحرن زي الحمار الحصاوي وهتضيعي من وقتك الثمين في مذاكرته حوالي ساعتين سكرك فيهم هيعلى لدرجة انك ممكن توردي منه للحكومة في ظل نقص السكر

٢- ده ملغي..ده مش ملغي.. ده بيجي في الامتحان..ده مجاش قبل كدة واكيد هيجي في الامتحان... دي اسئلة استاذ زعبلاوي ودايما الامتحان بيجي من اسئلته... ميس فتيحة عاملة "ريڤيجن" حصة خمس ساعات ب٢٠٠ جنيه.. كل ده جلاش باللوبيا.. خلاص.. لا تعقيد ايام الامتحانات.. اللي ذاكر ذاكر.. الحشو بلا رحمة هيخلي الواد يروح يرسم نسانيس في ورقة الاجابة

٣- مش معنى ان دي ايام امتحانات يبقى ده سبب لارتفاع مؤشرات التشنج على سكان الغرف اللي في المنزل واللي في الدور واللي في العمارة وعلى الساكنين خارجها مراعاة العبور في طريق مدخل العمارة.. بالهداوة.. كدة كدة تعليمنا عامل زي الافوكادو.... لا هو مانجا ولا هو خيار..

٤- اللوكوموتري سيستم والديجستف سيستم وافتح يا سيستم... دي المفروض تبقى حاجات تثقيفية... الواد مش هيخش يعمل عملية فتاء للبواب بكرة الصبح... بالراحة وحبة حبة بدل ما احنا كلما هيجيلنا تحكم لا ارادي في اليوريناري سيستم من الخضة يا جماعة

٥- الكوابيس اللي بتيجي بالليل انك سقطتي يا ست الكل مش كويسة عشانك... مش انتي اللي هتمتحني... اي نعم انتي اللي بتذاكري.. بس مش انتي اللي بتمتحني... ريلاكس.. الحول على كبر بيبقى علاجه صعب..

٦- متتالية اللطم الصاروخية اللي بتبدأ وما بتنتهيش لما تكتشفي ان الواد نسي وحدة كاملة ما ذاكرهاش قبل الامتحانات بكام يوم... مش هتنقذ الموقف.. هتشوه وشك مش اكتر.. حاولي تستقطعي من وقت اللطم نص ساعة تلمي فيها اللي تقدري عليه بالتناوب مع نباطشي البيت..... چوزك

٧- الخروج من منهج تالتة لمنهج اولى اعدادي وبعدين النزول لمنهج رابعة قبل الدخول على منهج سادسة بيخليكي ممكن تمسحي اينشتاين بأستيكة لو اتفضل وقعد معاكي على ترابيزة المذاكرة.. فا اللي عندها اتنين او تلاتة.. لازم تركب فردة سلك ارض عشان تفرغ الشحنات الزايدة بدل ما النجف يعمل قافلة


535 مشاهدة