• رؤى ومقالات
  • د. محمد فاروق يكتب : مراجعات مفهوم الوطنية والخيانة .. البرادعى نموذجا !

د. محمد فاروق يكتب : مراجعات مفهوم الوطنية والخيانة .. البرادعى نموذجا !

تم النشر فى مع 0 تعليق اضيف بتاريخ : 12/01/2017 الساعة : 1:05:18

 

طيب يا جماعة أنا الحمد لله ماليش علاقة بالكلام اللي لابس قُبعة ، وربنا عافاني من ابتلاء الاتساق مع النفس ، وإن كانت الحاجات دي من شروط البهوية فالحقيقة يحيا العدس عشر مرات !

موقفي من البرادعي زي ناس كتير ، بنينا موقفنا على شواهد كتير ، آخرها مكالمات أحمد موسى " المُعادة " .. لأنها مش جديدة وسمعناها قبل كده !

بس انا مش فاهم انت رافض تخوين البرادعي ليه ؟

هو معنى الخيانة إيه من وجهة نظرك ؟

لازم يكون جاسوس زي أيام زمان مثلاً ؟ ومعاه جهاز لاسلكي ؟ والريس زكريا يكشفه ؟

يعني أنا شايف إنه بلاش استعباط ! أو بلاش تفتكر إن أفكارك في منتهى الحيادية والاتساق مع النفس لأنك محتاج تراجع مفاهيمك ، وأولهم معنى الوطن !

البرادعي بيتكلم مع " دان " .. وبغض النظر عن شخصية المدعو " دان " لأنه أنا ماعرفوش ولا أدَّعي إنه رجل المخابرات الأمريكي ولا يحزنون !

إنما " دان " أخد كل المعلومات علشان ينقلها لمين ؟ ... لـ William J Burns .

وليام برينز هو رئيس سابق لمؤسسة كارينجي اللي جابت لنا عمرو حمزاوي وأمثاله

وليام برينز مساعد وزير الخارجية سابقاً بقرار من كونداليزا رايس صاحبة مشروع الفوضى الخلاقة

وليام برينز هم مسئول ملف الشرق الأوسط في الفترة اللي ضرب فيها الربيع العربي " الخريف العربي " كل الشرق الأوسط باستثناء إسرائيل !

المعلومات اللي قالها البرادعي من وجهة نظر حضرتك معلومات عادية ومعروفة ! لذلك بقول لجنابك لازم تراجع مفهوم الوطن وخيانة الوطن بداخلك أولاً .

البرادعي قال لوليام برينز كل نقاط الضعف " بقصد أو بدون قصد " ، قال له إن المشير طنطاوي والمجلس العسكري شايلين هم 10 مليار دولار بشكل شهري علشان يدفعوا الرواتب لموظفي الدولة ، والموضوع ده بيخليهم يتصلوا بدول الخليج ويحاولوا يستدينوا منهم ويطلبوا مساعدتهم ! والبرادعي بيقول له أتمنى إنهم يلجأوا لكم وتساعدوهم اقتصادياً وأمنياً لأن الحالة الأمنية منفلته جداً !

في كل الحوارات دي كان " دان " بيحاول يفهم تفاصيل أكتر ، يعني حضرتك شايف إن خبر احتياج مصر لـ 10 مليار دولار شهرياً كان معروف وعادي ؟ بالتحديد 10 مليار ؟ ماهو طبيعي دولة في كارثة زي حالاتنا في 2011 بتكون محتاجة دعم ! بس الناس ماتعرفش محتاجة كام تحديداً ؟ ومحتاجة الدعم في إيه ؟

هل رواتب ؟ هل نقص سلع استراتيجية ؟ هل فيه احتمال لنقض الأدوية في غياب الاحتياطي النقدي من العملة الأجنبية ؟

ده حتى كان بيسأل البرادعي عن خطة المجلس العسكري القادمة ، هتعملوا دستور في وقت أد إيه ؟ طيب 6 شهور كفاية للدستور وللانتخابات الرئاسية ؟

ماهو بناءً على المعلومات دي كلها ممكن صاحب المؤامرة يحدد خطته ويستخدم نقاط الضعف والاحتياج لضرب الاستقرار وتوريط مصر واستمرار عجلة الفوضى !

يا أخي إذا انت شايف إن المعلومات اللي قالها البرادعي عادية ومعروفة ، ليه بيقولها البرادعي لـ " دان " ؟ ماهي معروفة طيب ! هي آن باترسون مش هتعرف ؟ ليه يحتاجوا البرادعي إذا آن باترسون عارفه ؟ بيطمئنوا على عملية التحول الديمقراطي مثلاً ؟ ما هما يقدروا يطمئنوا عليها بشكل رسمي !!! إيه أهمية الاتصال بالبرادعي إذا كان الموضوع معروف وعادي ؟

لا إله إلا الله !

يا أخي من البداية أصلاً ليه نهتم بنقل الأخبار بالدقة دي لأمريكا ؟ يعني انت بعكس كل الناس ، البرادعي بعكس كل الناس ؟ كل الناس ؟ كل الناس منذ بدء الخليقة في مصر وحتى الآن والجميع بيتعامل على إن أمريكا عدو ولا ينبغي الخضوع ولا التبعية لسياساتهم ، كل الناس من المثقفين والشعراء والسياسيين والدبلوماسيين وأبناء مبارك وشعب يونيو " كل الناس "

أعتقد إن البرادعي كان بيطمن دان ووليام برينز عن صحة مصر وبيوصيهم يجيبوا كيس برتقان وهما داخلين !   


117 مشاهدة