الرئيسية / رؤى ومقالات / احمد عفيفي يكتب : ” بص العصفورة

احمد عفيفي يكتب : ” بص العصفورة

انا موافق انك تقول ان هناك تقصير أمني ، موافق كمان انك تطالب بإقالة مش وزير الداخلية ، لأ ياسيدي ، ايه رأيك في رئيس الوزراء نفسه .. عارف .. حامشي معاك للأخر واطلع معاك لفوووووق اوووووي ، وممكن ناخد وندي في الكلام لو حتى قلت ان السيسي اللي هو رئيس الجمهورية يمشي ، قول وعدنا انه حيحارب الارهاب ، ومن وقتها والارهاب ” مكسعمنا ” .. فيه اكتر من كده ياعم .. أديني مشيت معاك وعديت كل الخطوط الحمرا .. إنما تقوللي ان اللي حصل من يومين في الكنيستين ” طنطا  والاسكندرية ” شغل النظام ، وان الحكومة والأمن هو اللي عمل كده بأمر مباشر طبعا من رئيس الدولة ، عملا بمبدأ الإلهاء  ” بص العصفورة ” ، فانت لامؤاخذة مش دماغك ممسوحة وبس ، ده انت البعيد لاشايف وراك ولا قدامك والعقل اللي في راسك عايزة له ” عَمرة ” .. أبلاتينه لدع !
نظام ” بص العصفورة ”  ده عارفينه من زمان اوي في مصر ، عندك أزمة كبيرة في رغيف العيش مثلا ولا البنزين مش موجود والعربيات واقفة طابور من المهندسين للجيزة على محطات الوقود ، اقوم افرقع مشكلة ما عشان ألهيك عن المشكلة الكبيرة ، انا فاكر مثلا ان لاعب اسمه رضا عبد العال كان نجم كبير اوي في الزمالك ، قام راح الأهلي ، ومكنش فيكي حديث يامصر في الشارع الا عن الموضوع التافه ده ، رغم انه من ساعة ماساب الزمالك ، مقمتش له قومة تاني واتنسى ، والنهارده بيتحايل على مقدمي البرامج عشان يجي ياخد له قرشين ويقول كلمتين لايودوا ولا يجيبوا ، فالنهارده مثلا لو عايز الناس تتلهي عن الارتفاع الجنوني للاسعار وتنسى حكاية تيران وصنافير اللي حيروحوا للسعودية ، اقوم الهيك بحكاية سما المصري اللي حتقدم برنامج ديني في رمضان ، وصاحب القناة عشان بس الشهر الكريم اشترط عليها انها تلبس طرحة وتقلد الستات المحترمات ، وبلاش تهز لنا في ( ………….. ) ولا تدينا ضهرها وتصدر لنا لامؤاخذة ” هنشها ” .. ماشي كل ده ماشي وممكن نبقى في منتهى العبط بجد ونتكلم في حكاية سما المصري شهر وشهرين وننسى الحاجات التانية اللي تجيب الضغط والسكر والقلب.
هو ده نظام ” بص العصفورة ” ، انما اقتل اكتر من 50 واحد ” مسلم ومسيحي ” في يوم عيد ، واحط نفسي في موقف زي الزفت واستحمل كل الكلام المهبب اللي ممكن يتقال عني كنظام وحكومة ، عشان مثلا ألهيك عن تيران وصنافير واسلمهم للسعودية تسليم مفتاح ، أظهر نفسي اني مش قادر احمي شعبي ودولتي واتسكع كام قفا من هنا وهناك عشان مثلا الناس تبطل تتكلم في السكر والزيت والسمك والفول اللي محدش قادر يشتري له سندوتشين منه ، ولا طبق الكشري اللي محتاج تعمل جمعية وتقبضها الأول عشان تاكله ، ده كلام ميدخلش عقل عيل ” بشخة ” ، فما بالك بواحد طول بعرض وشنبه عامل مظلة تحت مناخيره.
عشان كده رغم اني ماليش نفس اكتب اى حاجة الا اني واحد صاحبي استفزني بجد وانا بسأله رأيه عن اللي حصل من يومين في الكنيستين ، فقاللي : ياعم احمد .. انت راجل مثقف ودماغك كبيرة ومش ممكن تتوه عنك الحكاية دي ، فسألته : تقصد ايه ؟ .. فرد : ” بص العصفورة ” .. واضحة للأعمى.
عصفورة ايه وحمامة ايه يا افندي ، طيب والواد اللي احنا كلنا شفناه بيفجّر نفسه عند البوابة الالكترونية ، الحكومة هى اللي جابته وعكّمت أهله بكام مليون وغسلت دماغ أمه عشان يروح يموت ويدخل الجنة ويلاقي يجي 50 من حور العين بيتخانقوا عليه ؟ 
ده ايه الدماغ المتكلفة دي ، واخد لك كام قرش حشيش عشان السطلة دي كلها .. عصفورة مين يابو عصفورة؟!
طيب ماهو اليوم باين من أوله .. لسه مخلصتش من ابو عصفورة إلا والاقي واحد تاني ” إخواني أبا عن جد ” بيسلم عليا ويقوللي : شفت أخرة حكم العسكر اللي انت بتأيده .. لو مرسي كان موجود في الحكم – وقبل ماتجاوب احلف على مصحف انك حتقول الحق – حسأل تاني : لو مرسي كان موجود كان حصل اللي بيحصل ده دلوقتي ؟
ضحكت من فرط جهله وقلت له : من غير حلفان ولا مصحف .. الاجابة طبعا .. لأ .. وقبل ما الاقي ضحكته جايبه من وشه لحد قفاه قلت له : اذا كان هو واللي معاه في السجن واللي بره بيدفعوا بالمليارات ورا البلاوي السودا دي كلها ، فطبيعي طبعا انه لو كان لسه ” متنيل ” على عينه وبيحكمنا ، لا كان حيبقى فيه إرهاب ولا يحزنون ، بس كان حيبقى فيه الاوسخ من الارهاب والقنل والدبح والدمار ، مكنتش حتلاقي مصر اللي بنحبها ونعرفها ، مصر الفن والعلم والثقافة والنور اللي بيشع في العالم كله .. كنا حنبقى ” مسخ ” ، وكان – طال الزمن او قصر – حنشيله حنشيله!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *