أمــانى إبراهيم تكتب : فنجان أبله أمـــانى !

تم النشر فى مع 0 تعليق اضيف بتاريخ : 05/10/2017 الساعة : 6:59:06

منذ سنوات طويلة وأنا غرقانة  فى محاولة فهم الأبراج والكواكب ..وأنا فى المطبخ بدلا من -  سلق البيض أو عمله أومليت - جربت ألعب “بالبيضة والحجر”  وكل مرة كنت بكسر الحجر ! و بدلا من عمل كابتشينو كنت بافتح الفنجان واقرأه .. و كل مرة اسلم على صحباتى أفضل ماسكه ايديهم علشان اقرالهم الكــف  ..  و عندى خبرة عريضة مستطيلة فى فك الرموز و الشفرات  .. وأستطيع فتح المندل وقراءة الطالع والنازل والرايح والجاي ..  و توقعاتى دون أن اهتم " صابت " أو " خابت " بحب قبل ما انشرها أغسلها  وبعدين أكويها ...!
نوقعاتى لعام 2018 : ستشهد مصر مظاهرات حاشدة تدعو لعودة  مسلسل " ضمير أبله حكمت " المسلسل الاجتماعى الذى حاولت فيه فاتن حمامة التى كانت تعمل ناظرة لمدرسة البنات أن تطبق تجربتها التربوية المتميزة فى كل مدارس الاسكندرية ..  تعالى يا أبله حكمت شوفى ايه اللى بيحصل فى المدارس والجامعات  دلوقتى .. تعالى شوفى الطلبة بيضربوا المدرسين والوزير بيقول أن المدرس حرامى .. علشان كدا احتمال يحصل مظاهرات تطالب بعودة أبله حكمت لتكون وزيرة للتربية والتعليم  وربما يطالب الشعب بعزل الطلبة عن المدرسين بحيث تكون هناك مدارس للطلبة فقط  ومدارس أخري للمدرسين فقط  ..  يعنى م الاخر بلاش نحط الكبريت جنب البنزين !! 
ستقوم مظاهرات عارمة بسبب رفع أسعار البيض والفلافل و ستضطر الدولة للتراجع و ستصرف لكل مواطن 4 بيضات احتياطى على بطاقة التموين  حتى لا ينفجر الوضع   وكذلك سيتم رصف الشوارع بمواد تساعد على التزحلق  والتمرغ  والشقلبظانات حتى يصل المواطنين الى عملهم دون الحاجة لاستخدام المواصلات نظرا لرفع اسعار المحروقات ..  و كدا الحكومة بتفكر  خارج الصندوق .. وأحيانا بتبقى خارج كوكب الأرض وعطارد  كمان ..!
 و فى العالم العربي سيتم الاستغناء عن جميع المواطنين .. لإنهم بصراحة عبء ع الحكام ..  و هما السبب فى كل الكوارث .. يعنى حوادث القطارات مثلا لو مفيش ركاب مكنشى حد مات .. و حوادث السيول لو مفيش ناس عايشة فى البيوت مكنش حد غرق ومات .. و كمان الهجرة غير الشرعية لو الناس ماحولوش يهربوا من بلدهم اللى مكرماهم و معزازهم و صارفة دم قلبها عليهم مكنوش غرقوا .. فى حد برضو يسيب العز دا كله والبغدده ويهرب ..بصراحة البلد من غير مواطنين  كل مشاكلها هتتحل ..  وهتبقى أفضل دولة وأنضف دولة .. والحكام هيعيشوا فى روقان وراحة بال !! 
فى النهاية أذكركم  بقوله سبحانه وتعالى {وَعِندَهُ مَفَاتِحُ الْغَيْبِ لاَ يَعْلَمُهَا إِلاَّ هُوَ }  وقول الرسول الكريم:  من أتى عرافاً فسأله عن شيء لم تقبل له صلاة أربعين ليلة. .. ختام القول أنه لايعلم الغيب إلا الله ..


123 مشاهدة