مها الجميعي تكتب : النادى وطنى الصغير (2)

تم النشر فى مع 0 تعليق اضيف بتاريخ : 12/10/2017 الساعة : 4:11:09

  

وطنى الصغير متميز فى كل شىء .. اكثر ما يميزه هم اعضاؤه .. نعم اعضاؤه .. اعضاؤه كتله من الوعى والثقافه والاخلاق ... خليط ناجح من فئات المجتمع المصرى .. فيهم وزراء ومحافظين ودكاتره ومحاميبن وشباب جميل منتظر ياخد الرياده ويستلم الرايه ... اعضاؤه يعشقونه وان اختلفت طرق اظهار هذا العشق من شخص لاخر .. زى بالضبط مصر وحبنا لها .. كل واحد بيحبها بطريقته .. ولم لا .. السنا مجتمعا صغيرا نعكس كل ما يحدث فى مجتمعنا الاكبر.. السنا مرآه وصدى له ؟

على مر العصور ادار هذا الكيان مجالس محترمه من اعضاؤه الموقرين .. اضافوا له واضاف لهم .. نعم اضاف لهم فهو كيان يشرف اى شخص .. اناس محترمون وقامات كبيره واسماء وطنيه ومصريه عظيمه تطوعوا لخدمته واداره مجلس ادارته .. تطوعوا وارهقوا انفسهم بالمسؤؤليه للحفاظ عليه وخدمه اعضاؤه ... نعم يخدمون اعضاؤه بلا مقابل .. فمجالس ادارات النوادى المصريه مناصب تطوعيه .. جزء من العمل العام الاجتماعى التطوعى.. بيعطوا من وقتهم وخبرتهم لخدمتنا نحن الاعضاء ..

كل 4 سنين ننزل ننتخب من بيننا من يمثلنا فى المجلس علشان يشرف على شؤؤنه(اشراف وليس تنفيذ العمل) .. كل 4 سنين نبقى محتارين هنختار مين ولا مين ولا مين من كتر الاسماء المبهره والمنافسه القويه بين الاسماء المرشحه .. الدعايه بتبقى قويه والمنافسه شديده .. وفتره الانتخابات بتبقى مهرحان جميل فيه عمل ومنافسه وابهار فى طرق الاقناع والجذب . .. يوم الانتخابات بيبقى قلق وتوتر وتسارع ولعب وضحك وزحمه وتعب وارهاق لذيذ لكل من ساهم .. ثم فرحه عارمه للجميع مع اعلان النتائج... الفائز والفائز ... مافيش حد خسران  ...فيه بس حد شال المسؤؤليه بس الكل فائز ... سيمفونيه رائعه يقودها الاعضاء .. نعم الاعضاء ... اليسوا هم المعنيين بالامر .. اليس المجلس من الاعضاء والى الاعضاء ؟

السنه دى الوضع اختلف زى مااختلفت حاجات كتيره فى مصر  ..فيه احجام عن المنافسه فى انتخابات النادى .. فيه احجام عن العمل العام اللى كان زمان الناس تتمناه وتجرى وراه .... الأعداد المنافسه قليله جدا مقارنه بما مضى .. مع ان يا اصدقائى المنافسه دى مهمه اوى فى اى مكان فيه خدمه مقدمه ..  المنافسه الشريفه شىء اساسى للارتقاء باى صناعه بما فيها صناعه تقديم الخدمات سواء  الخدمات التطوعيه او المدفوعه ..  الكلام ده ينطبق على انتخابات النادى  .. المنافسه لصالح الاعضاء  بالدرجه الاولى وهتحمس المرشح  وهتلهم الناجح  علشان يحافظ على اداؤه بعد ما يقعد عالكرسى .. مافيش اسوأ من الانفراد بالسلطه والهيمنه عليها .. احنا اللى هندفع الثمن لو الناجح اطمأن ان مافيش غيره ومش هييجى غيره وما نقدرش نجيب غيره .. بس فى نفس الوقت لازم نتعامل ونتنافس برقى وشياكه لان انت قاعد فى بيتك ولان الموضوع مش مستاهل الضغائن... قله المنافسه مع مرور الوقت بتقلل من مستوى الخدمه المقدمه وده مش لصالح الناس ولا المكان.

من اهم الاسباب فى رايى فى قله الاقبال هو الخلط فى الفهم بين الدور التنفيذى لمدير عام النادى والدور الاشرافى المسؤؤل لمجلس الاداره .. الناس خايفه تترشح لان فيه خلط فى توقعات الناس بين دورهم الاشرافى ودر مدير النادى التنفيذى ...  الخلط ده اضعف دور ومقام المجلس لانه انشغل بما ليس له .. وده شىء مش لصالح المكان ولا الناس ..  فالمجلس ليس تنفيذيا ... يعنى مالوش دعوه بال Day to Day Operation بتاعه النادى ... مالوش دعوه بمشاكل الاعضاء الا لو اترفعت له من مدير النادى او اتعرضت فى جمعيه عموميه .. عمرك وانت بتشتغل فى شركه او بنك محترمين شفت اعضاء مجلس الاداره ماشيين جوه الشركه يشوفوا نضافه المكاتب ولا يشوفوا الحضور والانصراف بتاع الموظفين ولا مين عمل ايه امتى ..  ؟؟ . ...  اصلا مجلس الاداره مالوش مكتب يقعد فيه الا غرفه اجتماعات ... ده انت ممكن تقعد فى وظيفه طول عمرك ما تشوفش اعضاء مجلس الاداره غير مره او مرتين ! ..  بس بتشوف العضو المنتدب او مدير عام النادى  باستمرار لان ده اللى مسؤؤل هو وطاقمه عن حل المشاكل ومتابعه العمل اليومى وراحه الاعضاء وانجاح الروتين الاجتماعى والرياضى فى النادى .. ولو فيه مشكله مستعصيه يرفعها لمجلس الاداره ... ده اللى له مكتب نخبط عليه ولازم يتفرغ لمهامه ويتواجد بصفه مستمره  .. اما المجلس فغير مطلوب منه التفرغ ولا التواجد الكامل .

 مسؤليه المجلس تقتصر على  وضع الاطار العام لمهام ال 4 سنين وما يتطلبه .. يعنى عاوزين نتفوق فى الرياضه نعمل ايه ... ... عاوزين نزود ايرادتنا نعمل ايه .. وهكذا .. ومدير النادى ينفذ مع طاقمه ... المجلس  يخطط للتفوق الرياضى ويوفر طرق زياده الموارد ويضع جداول زمنيه لمدير النادى وطاقمه ويشرف على تنفيذها ونحاسبه على كل هذا  ... شغل المجلس فى النادى داخل اجتماعات المجلس للتخطيط واثناء عقد الجمعيات العموميه عندما يقدم كشف الحساب .. غير كده دى مسؤؤليه مدير النادى ..... لما تلاقى كرسى مكسور ولا وجبه مش سليمه او اى تقصير من عامل او موظف ده مسؤولية مدير عام النادى مش المجلس ..

 

الفصل فى الادوار والمسؤؤليه والمهام اليوميه مهم اوى علشان نعرف حقوقنا ونديهم حقوقهم ووضعهم واحترامهم اللى يستحقوه .. فى النهايه دى ناس بتخدمنا بدون مقابل وبتسيب اولادها واشغالها وعائلاتها  علشان يخدمونا ويحافظوا على النادى .. بيخدمونا و مش بيشتغوا عندنا ..وحتى لو بيشتغلوا عندنا لهم حقوق علينا زى ما لنا حقوق عندهم ولازم نحافظ علي حقوقهم علشان ناخد حقوقنا ... حقهم علينا الاحترام والثقه الا ان يثبت العكس ... حقهم علينا نفهم  دورهم ونسببهم يشتغلوا ونسمح بالاخطاء الايجابيه التى لا تتكرر .. فتتكرر الاخطاء يشير الى قصور فى  الاداء ..  حقهم علينا اننا  ما  نخلطش بين دورهم ودور  مدير النادى التنفيذى اللى بيلف يوميا فى طرقات النادى   .. اما حقنا فانهم يوفوا بوعودهم ويشتغلوا مع بعض ويلتزموا بالحفاظ على النادى وموارده ويعلوا بالرياضه ويحسنوا من خدماته .. حقنا انهم يسمعونا خلال القنوات السليمه ومن خلال  الجمعيات العموميه .. حقنا يردوا بشفافيه ويقدموا كشف حساب فى الجمعيه العموميه ..  فلازم نتابع ونحضر الجمعيات العموميه لمناقشات الاعمال ونحاسبهم  بكل احترام  وثقه وادب  ...  هنحاسب لانه بيتنا وتركه وامانه ورثناها من اهلنا  وهنسيبها لاولادنا فلازم نحافظ عليها ...محدش كبير عالمحاسبه ... الامتناع عن الجمعيات العموميه والمحاسبه هيفشلنا وساعتها احنا المسؤولين .. لازم نفهم صح ونقوم بدورنا صح علشان هما يعملوا دورهم صح .. منظومه لو مشيت صح كله هيفوز والكل هيسعد وهينجح .. قولوا يارب  ! ..

.........................

وللحديث بقيه ..

 


1008 مشاهدة