الرئيسية / ثقافة وفنون / الفنان العالمي سيد بدرية …للعربي اليوم … بقول لاي شاب متابع ليا وهما حبايبي كلهم ..لو انت شاطر في بلدك هتبقي شاطر في اي مكان .

الفنان العالمي سيد بدرية …للعربي اليوم … بقول لاي شاب متابع ليا وهما حبايبي كلهم ..لو انت شاطر في بلدك هتبقي شاطر في اي مكان .

حوار : احمد عمر 

تعددت اعماله الفنية السينمائية في هوليوود حتي وصل رصيده لحوالي ستين فيلما مثل منهم امام ال باتشينو ومارك والبرج وهال بيري وجونيث بالترو وجاك بلاك وروبرت داوني وكثيرين ..وهو محبوب علي المستوي الفني والشخصي من جميع من عمل معه ويتمتع بصداقات كثيرة مع المع نجوم هوليوود ..واخيرا شاهدنا برنامج لسيد بدرية يذاع علي مواقع التواصل الاجتماعي ..من تقديمه ويحكي فيه عن حياته ونشأته وتجاربه وخبراته الحياتية ونصائح لمتابعينه ..كان لنا معه هذ الحوار والذي خص به موقع العربي اليوم وكان حوارا من القلب .

س : ماالذي دفعك لتقديم برنامج من انتاجك الخاص علي السوشيال ميديا مثل برنامج صراحة ابن الحارة ؟ 

ج : انا لقيت ان فيه اقبال شديد علي اللايف المباشر علي الفيس بوك بيني وبين متابعيني ووصل لالاف المتابعين والشباب بيعتبروني ان انا عمهم وبيشوفوا فيا اصالة الانسان بتاع زمان ..والشباب مابقاش يشوف تليفزيون ..لان كل الموجودين في الاعلام بيكذبوا عليهم..ومش بيدوهم المعلومات الصحيحة ..وكمان فيه شباب لايثق حتي في اولياء امورهم لان كل شئ من حولهم اصبح كذب ..وسط العتمة الاعلامية والتطبيل وكله بقي شايل صاجات وكله اصبح صبي عالمة ..حتي اللي عاملين مشاهير اصبحوا يروجوا للكذب للاسف .

س : هل وجد فيك الشباب الذين تخاطبهم من خلال برنامج صراحة ابن الحارة طوق نجاة لاحلامهم وامالهم ؟

ج : انا بقولهم اني عمكم وخالكم اللي بيصالحك علي ابوك وامك ..انا بقولهم اشتغلوا الشئ اللي بتحبوه بدل قعدة البيت انا اللي بديهم بصيص امل في الحياة علشان يبقوا ناجحين ومايكونوش عرضة انهم يبقوا سلبيين او عالة علي حد ..انا بحفزهم واخليهم يعملوا سيرش علي الانترنت علي الشغل والفرص والسفر ويكونوا ابطال في مهنتهم وبديهم القدرة انهم يقعدوا ساعتين او تلاتة علي الانترنت يبحث علي حاجة بيحبها وانه ينمي ويطور نفسه .

س : بالنسبة للسفر لامريكا واوروبا ..وانت طبعا سافرت من 40 سنة لامريكا وكافحت الا ان وصلت للعالمية واصبحت ايضا بجانب الفن رجل اعمال ..هل بتحفز الشباب انهم يكونوا مثلك ويسافروا يشقوا طريقهم ؟ 

ج : انا بقول لاي شاب متابع ليا وهما حبايبي كلهم ..لو انت شاطر في بلدك هتبقي شاطر في امريكا وتبقي من افضل الناس هناك كمان وبقولهم ركز علي نفسك وعلي شغلك وعلي اللي بتحبه ونمي نفسك ساعتها هتنجح ..انا مش اكتر من واحد بيديك نور وامل لبكرة وبقولك تروح فين وتعمل ايه ..طبعا بوجه كلامي لاي شاب من من اللي بيعتبروني عمهم وابوهم .

س : لكن ايه السر يا عم سيد لزيادة عدد متابعينك علي السوشيال ميديا بالالاف زي مابنشوف علي الايف الخاص بيك ؟

ج : لاني صادق معاهم وحسوا اني واحد منهم ولا بزيف الحقيقة معاهم ولا بقول غير الصدق وبعدين انا لاعمري وعدت حد بشغل او حاجة زي كده ..انا بساعد الشباب انهم يعيدوا اكتشاف نفسهم ..وبعدين اقولك علي حاجة مشكلتي ان امي اللي يرحمها دعت وقالت ربنا يحبب فيك خلقه يا سيد ودي نتيجة حب الناس الحمط لله .

س : لماذا لانشاهدك مؤخرا ضيفا علي برامج مصرية مثلما حدث معك في الماضي وكنت ضيفا لاكثر من برنامج ومنهم مع عمرو اديب وجيهان منصور ولبني عسل ؟ 

انا اعملي حظر اني اطلع في برامج مصرية ..لاني بقول الحقيقة ومابطبلش ..انا وطني من بورسعيد مدينة البواسل ومش محسوب علي اي فصيل سياسي او ديني 

س : ماذا تتوقع لبرنامجك عم سيد صراحة ابن الحارة مستقبلا والمردود من وراءه ؟ 

ج : لو واحد بس شافه يبقي انا كده حققت رسالتي ورسالة البرنامج وانا مش بدور علي النتيحة ايه قد مااني عندي هدف ورسالة واني ابعث الامل في الشباب ..واحد بعتلي بيقولي الدنيا كانت مظلمة وكنت يائس الا اني شفت وسمعتك يا عم سيد وساعتها دب فيا الامل ورميت اليأس ورا ضهري وبقيت واحد تاني ..وواحد تاني قالي من ساعة ماشفتك بتتكلم وانا بقيت اساعد امي وزمايلي واتغيرت فعلا .

س : هل يختلف اسلوب البرنامج عن اسلوب اللايف الخاص بيك علي السوشيال ميديا ؟ 

ج : انا في اللايف بتكلم بحرية شديدة مع حبايبي ومتابعيني وممكن نهزر واقولهم يا لحمة راس انت وهو وكده ..اما البرنامج فهو اكثر تحفظا ومدته اقل 15 دقيقة والمفروض اوصل فيها كل حاجة والبرنامج بعتبره ذاكرة للتاريخ سيكون عبرة وعظة للاجيال القادمة واجمع في حلقاته خلاصة تجاربي وخبراتي ليكون عظة ونصيحة لمن يراني ويسمعني .وده دين عليا بأديه ..ويارب اكون عند حسن ظن الناس بيا وان البرنامج يكون عبر فعلا عن سيد بدرية ابن الحارة بياع الاحلام …عم سيد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: