وحلفنا بالله العظيم....شعر سوزان كمال

تم النشر فى مع 0 تعليق اضيف بتاريخ : 07/11/2017 الساعة : 8:52:41

وحلفنا بالله العظيم
الطيبين مش أغبيا
        ولا أوليا
       ولا أنبيا 
ولا هـُما ليهم معجزات
يعني بنخسرهم ساعات
وساعات يثوروا ويغضبوا
وساعات ميوفوش بالوعود
والصبر فيهم له حدود
وساعات يشوفوا الصورة
من جوا أووي
ويبانوا مش فاهمين
هما تمللي مخلصين
لكنهم ساعة اللزوم قاسيين
وستاير الرحمة يدوبها الأسى
وقلوب تنام من غير عشا
                    ف تمـوت  ....
    كــل الحـكـايـة 
    ان الرصيد بيقل
خيبة الأمل    بتخللي روحنا
              تــمــل
كتر الوجـع بيبعد المسافات
ولا يبقى بيننا 
لا شجـر ولا ضـل


95 مشاهدة