ريهام عرفة تكتب : أرجوكم .. بلاش مسلسلات تركي !

تم النشر فى مع 0 تعليق اضيف بتاريخ : 09/11/2017 الساعة : 1:16:42



 

كل علاقتى بالمسلسلات التركى مجرد مشاهد متفرقة بشوفها بالصدفة وأنا معدية من قدام التلفزيون أو و أنا بقلب ف القنوات أو من صور و بيدجات ع الفيس ...من علاقتى السطحية دى مع المسلسلات التركى ..قدرت أكون وجهة نظر عميقة فيها وف كل أركان الدراما التركية بشكل عام :

=الكاتب :

مبدئيا كدا أنت سبب السواد اللى احنا فيه ده كله أه والله ... أيه يا عم الحاج !! ايييييييه !! بالع راديو ! ونش شغال كتابة !! كل دى حلقات !! كل دى أجزاء !! وليه المسلسلات عندك تلت أنواع بس !! النوع اللى هو لازم تحط فيه كلمة ( زمان) ده وغالبا بيحكى عن قصص حياة أشخاص كلها بؤس وكئابة ومصطفى كامل وأرف .. زى على مر الزمان .. وغدر الزمان .. وأى هبل بينتهى بكلمة (زمان) وخلاص ..... والنوع التانى اللى هو بيبتدى بكلمة العشق ..العشق الممنوع ... العشق الاسود ..العشق البنى الفاتح !! وده ف العموم بيحكى عن اتنين بيحبوا بعض ف مية وسبعين حلقة ...وممكن الامور تتطور ويتخطبوا ف جزء تانى ..ويفركشوا ف جزء تالت ..اه ماحنا فاضيين بقى لأمهم عادى يعنى .. والنوع التالت ده بقى اللى هو حريم السلطان ...أه ده نوع لوحده كدا ..وده من استنتاجى كدا بيحكى عن سلطان أقرع كل البنات بتحبه كل البنات حلوين ..طبعا يا سيدى مين قدك ..مين اللى زيك مين... المهم يعنى ربنا ياخدك يا كاتب 

=المخرج :

ايه يابا !!!! ايه يا عمى !!! ايه يا خويا !!! أنجز شوية...أتعلم من المخرج المصرى طيب ....مثلا لما يكون فيه عيال صغيرة ف المسلسل ..المخرج المصرى بيقضى حلقتين بالظبط بالعيال الصغيرة ..وبعدين ف أول الحلقة التالتة يجيب شاشة سودا ومكتوب فيها ( وبعد مرور 10 سنين ) وهوبا تلاقيهم كبروا وبقوا ف فترة المراهقة ...أنت ليه بقى لازم تخلى العيال الصغيرة تقضى العشر سنوات بحالهم ف المسلسل لحد ما يكبروا طبيعى ف المسلسل !! ..هو كتر حلقات واجزاء وخلاص !! ..ليه مصمم تخنقنا..... وعندك مثلا تانى بردو المخرج المصرى لما يجيب مشهد فيه أكل ..بيجيب منظر من بعيد وهما بياكلوا وكلمتين وهوبا تلاقيه قلب على مشهد تانى ..أنت ليه بقى مصمم ف أى مشهد أكل انك تجيب الممثل وهو بيقشر جلد الفرخة ويرميه .. وبياكل الفرخة حتة حتة... وهو بيبلع ... وهو بيتكرع .. وهو بيشرب مية ..وهو بيشرب الشوربة ..وهو بياكل السلطة ... وهو بيوقع رز تحت منه ...ياريت ننجز ف أم المسلسل لو سمحت ..العمر الافتراضى للانسان الحديث بيقل والمصحف ..وفيرس الايبولا ع الابواب وكتاب الله !

=الممثلين :

أنتوا ليه كلكم بشنبة !! ها ليه ؟؟ ...هل ده من أساسيات التمثيل عندكم ! إن الممثل لازم يكون بشنب ! ..ولو العملية بالشنبات ..ليه ما بتستفدوش من خبرات مصرية عريقة ف المجال ده ..يعنى مثلا تاخدوا الشيف الشربينى اللى شعر شنبه بيقع من غزارته ف الاكل ..أو مثلا تاخدوا مجدى الجلاد .. طلعت ذكريا .. ياسر جلال ..أى حد بشنب طيب وتريحونا من شكله

=الممثلات :

معرفش منكم غير أتنين ..بيرين سات ..ودى اللى كانت قايمة بدور فاطنة اللى كانت بتحب_ لا مؤاخذة _كريم...

بيرين سات دى كافى بس أنك تبص لصورتها أو شكلها ويجيلك اكتئاب علطول ..البت دى انا كل ما أقلب ف القنوات الاقيها بتعيط ف المسلسلات .. أفتح الفيس الاقيها بتعيط ف صور البروفايل ..... افتح اليوتيوب الاقيها بتعيط ف الاغانى .. حتى مشاهد الفرحة القليلة ليها..مشاهد الفرحة .. بتعيط فيها من الفرحة !! ...اللى هو هاااااار اسود يعنى !!

الممثلة التانية بقى مش عارف أسمها .. بس هى عموما بشعر أحمر وف حريم السلطان ..ودى زى العسل ..أستمرى يا نجمة

=المشاهدين :

العمر أقصر بكتيير من أنك تتابع مسلسل تركى سبعتاشر جزء ..الجزء 200 حلقة ..عشان تعرف ف الاخر كريم هيتجوز فاطنة ولا لأ ... أنت ف الفترة دى ممكن تتجوز أنت فاطنة بجد وتخلف منها كمان شيماء وأسماء و حمادة صغير... أو أنتى ممكن تتجوزى كريم نفسه وتخلفى منه طفل هلف بشعر طالعله أو طفل شبه العيل التخين اللى كان ف فيلم (UP) طالعلك ...ولو ناوين يعنى تضيعو وقتكو ف حاجة أهم من الجواز .. ممكن ف الفترة دى بردو تتفرجو على 3256 فيلم أجنبى ..فيهم حوالى مليون قصة مختلفة ... ولو طالبة معاكو مسلسلات أوى يعنى وخلاص العملية مأشفرة ...ماله نور الشريف يعنى ؟..غسيل ولبس والمسلسل جزء واحد بيتجوز فيه يجى خمستاشر واحدة ف 30 حلقة بس ...بتحبو الاجزاء الكتير ؟ عندنا بردو سعد الدالى 3 أجزاء شاملة سوسن بدر وعزت أبو عوف ...

فياريت بلاش مسلسلات تركى عشان عندى ف البيت في ناس جابت لي ضغط عالي و واطي مع بعض بسبب انهم بيتابعوا مسلسل تركي مش راضى يخلص من تانية أعدادى و هما اهو هيتخرجوا السنة دي من الجامعة...ياريت


490 مشاهدة