أشرف متولي يكتب : أنـــا بِبَساطة حُرّ

تم النشر فى مع 0 تعليق اضيف بتاريخ : 10/11/2017 الساعة : 3:03:43

أنـــا بِبَساطة حُرّ

......................

أنا حر إزاي أفكر

ولا أكتب ولا أعبّر

وألوِّن ولا أسطّر

وانْقُد وبضميري

بس خُدْ بالك

أنا من غير ما أضُر

أنا حُر يا عم …حالِي

واكتب من غير ما أداري

وأصوَّر دا خيالِي

إنت مالك ومالي؟!

أنا مختار طريقي

وعمري ما في يوم أضر

أنا عاوزك تحترمني

ولا تزعل وتخاصمني

ولا تلوِي الوش منِّي

وخليك دايما في حالك

ومرايتك مش مرايتي

وإوعاك في يوم تضر

هو إنت ليه معارضني؟!

ودايما مضطهدنِي؟!

وعاوزني صورة منك

إن شاالله غصب عني!

ودايمًا شايفك مُصِرّ!

أكونش مخلوق عشانك؟

ومكاني هو مكانك؟

وكياني جوه كيانك؟

واتحرّك بالريموت

عشان أبقي قُصادك

كفاياك يا عم مُرّ

ما تشغلش بيا بالك

وعيش لوحدك حياتك

دا هُمَّا شوية دقايق

ولا تِزْعل عاللي فاتك

بكره كُلُّه يفارِق

ويبقي الكل حُرّ

مش لازم أعيش برأيك

وحقِّي يبقي حَقَّك

وأترجم بلسانِي فكرك

وأعيش ضهري بضهرك

وأعيش طول عمري ضِلّ؟

ولآخر مرة هاأقولك

أنا إنسان بسيط

وقريب مش بعيد

وحابِب أكون لنفسي

والكل جنب منِّي

وأنا حر وعندي فكري

واسألوا عني صاحبي

سيبونِي بالله دا حقِّي

أنا مش مِلْك حَد

ولا عُمْري هاكون …بِجَد

بس رَبِّي يِرْضَي عني

ولا يزعل حد منِّي

واتقرب إليه بطاعة

ما الدنيا إلا ساعة …

تصبح علي خير يا خِلْ 


742 مشاهدة