• منوعات ومجتمع
  • مها الجميعي تكتب : حدوتة حزينة عن بنوتة صغيرة إسمها "جميلة"

مها الجميعي تكتب : حدوتة حزينة عن بنوتة صغيرة إسمها "جميلة"

تم النشر فى مع 0 تعليق اضيف بتاريخ : 05/12/2017 الساعة : 1:32:03

جميله صحيت من النوم يوم السبت زى كل  يوم سبت عندها جامعه .. جهزت وسلمت على والدتها ونزلت الشارع فى ميعادها الساعه 7 الصبح .. وعلشان هى لسه 17 سنه  وعلشان جامعتها فى طريق الاسماعيايه الصحراوى اللى حوادثه كتير ف جميله بتركب مع صاحبتها دينا اتوبيس الجامعه اللى بيعدى عليهم الصبح الساعه 7ونص قدام البيت فى صلاح سالم بس الاتجاه المعاكس ... نزلت جميله ومشيت فى نفق المشاه بتاع صلاح سالم علشان تروح الاتجاه المعاكس تستنى الاوتوبيس مع دينا . فى نفس الوقت اللى هما واقفين فيه على الرصيف قدام الجامع بعيد عن السيارات ؛ كان فيه سواق فى عربيه داخليه (حوالى 22 سنه )سايق عربيه امن عام تابعه لوزاره الداخليه سايق بسرعه جنونيه متجه لمصر الجديده وقدامه سياره ملاكى .. فى ثوانى محدش عارف ايه اللى حصل بالضبط  لكن عربيه الداخليه خبطت الملاكى والاتنين حدفوا يمين ناحيه جميله ودينا .. ولان عربيه الداخليه مسرعه بزياده فالحدفه كانت اقوى واسرع وصعب التحكم فيها ... فى ثوانى لا يعلم قسوتها الا الله عربيه الداخليه خبطت البنتين   .. محدش قادر يلمس حاجه الا بعد وصول الشرطه لانها حادثه مرور ادت الى وفاه .. ودينا شالتها الاسعاف واهلها اتبلغوا !

اللى بعد كده عادى .. شرطه ومحضر والقبض على سائق الداخليه والتحقيق شغال  .. اهل جميله بيقولوا النيابه محترمه وشغالين بما يرضى الله والعسكرى مقبوض عليه وهياخد جزاؤه ... بس يا ترى هل العسكرى هو المتهم الحقيقى ولا عدم احترام وتطبيق قوانين المرور والسرعات المحدده فى منطقه سكنيه ؟ .. هل لو المجند ده اخذ جزاؤه هنطمن ان دى اخر حوادث الطرق ولا بكره هنلاقى عسكرى تانى وسائق آخر لا يتبع القوانين سايق عربيه تانيه وفيه ضحابا جدد ؟ بشاعه هذه الحادثه ان المتهم فيها فرد فى الجهاز المنوط له سلامه وامن المواطنين والمخول له سلطه تطبيق والمحافظه على قوانين المرور ... تعددت الاسباب والموت واحد.. عمر جميله ولحظتها مكتوب من يوم خلقها ولكن الى متى ستقتل العشوائيه ابنائنا .. الى متى يظل كسر القانون والاهمال هو عنوان حياتنا .. بنعلم ولادنا ازاى يمشوا عالرصيف وما يعدوش فى وسط الشارع وازاى يحترموا الاشارات ولكن مش هنقدر نعلمهم يعملوا ايه لما واحد يطلعلهم عالرصيف بعربيته ...  الى متى تظل مصر من اعلى الدول فى حوادث المرور  .. الى متى ؟؟

دينا  فى العنايه المركزه فى غيبوبه ... والدتها  بين بنتها فى المستشفى وبين والده جميله علشان تواسيها وتقف جنبها .. والده جميله ما بتقولش غير : احتسبت بنتى عند الله والحمد لله  ومش عاوزه غير انكم تدعو لبنتى .. وفى وسط دموعها وصوتها اللى مش طالع  بتدعيلنا احنا محدش يشوف حاجه وحشه فى ولاده ابدا ..

ادعو لجميله وادعو لدينا ربنا ياخد بيدها ويشفيها وترجع بيتها لاهلها سليمه شافيه باذن الله .. وادعوا لنفسكم ولاولادكم واهلكم ربنا يحمينا ويحميكم من العشوائيه والاهمال  اللى بقوا ماليين حياتنا اليوميه.



22643 مشاهدة