وَاشْ لَبْغُوغَ بُوسَة فِ اظْلَامْ ….. زجل بقلم //عبد الجليل الفولاذي الآسفي // المغرب

وَاشْ لَبْغُوغَ بُوسَة فِ اظْلَامْ

وَاشْ لَبْغُو غَ تَعْنَاݣْ
يْخَلِّ لَݣْلِيبْ يْتَكْتَكْ مَدْفَاݣْ
وَلَّا بَرَّاحْ مَجْدُوبْ عَوَّاݣْ
دَيُّو رَاسْ حَرْبَة
فيِ لْخَاطَرْ مَرْشَاݣْ

وَاشْ لَبْغُوغَ بُوسَة فِ الظَّلْمَة
عْلَى ݣاعْ حَبَّتْ الزِّينْ
وَلَّا تْهَرْنِينْ مَغْرُومْ اكْوَاتُو كَلْمَة
مَنْ حَرّْ الْوَلْفْ يْنِينْ

وَاشْ لَبْغُو غَ دْمُوعْ
مَلْحَافُو اطْمَعْ
وَلَّا فْزُوعْ فِينَا يَرْدَعْ
هْبَالُو تْمَكَّنْ وُسْكَنْ اضْلُوعْ
وَلَّا افْتِيلَة تَݣْدِي
فِي كُلْ نُوبَا تَهْبَا
تْخَلِّ الشَّمْعَة الدُّوبْ اخْنُوعْ

زَعْمَا مَ يْكُونَشْ بَسْمَة
تَمْسَحْ الدَّمْعَة
وَلَّا حْرُوفْ تْبَرَّدْ الجُّوفْ
وَلَّا نَشْوَة تَعْݣَبْ وَتْرُوحْ
وَلَّا نَزْوَة تْرُدْ الرُّوحْ
الدَّاوِي لَجْرُوحْ
وَتْخَلِّ لْمَغْرُومْ ايْدُوخْ
مْسَلَّمْ مَسْلُوبْ مَبْطُوحْ

بَلْحَقْ احْنَا لَبْغُو عَنْدْنَا غِيرْ ݣَانَة
امْجَاجْ يْحَادِنَا فِي سَاعْ
وَِلَّا طَوَّلْ عَنْدْنَا نْهَارْ ݣَاعْ
يْكُونْ فِيهْ الْݣَلْبْ الْݣَلْبْ مَفْتُوحْ
ؤُبَاقِي لَيَّامْ طْوَيَّرْ ايْفَدْفَدْ مَذْبُوحْ