أنس دنقل يكتب :ذكريات ايام الفقر الدكر !!

نهاية ستينات القرن الماضي.. طلبه بجامعة اسيوط..نسكن في افقر احياء اسيوط..الحمرا او الوليديه..
الغرفه ضمن شقة بالميه والنور ايجار الغرفه في الشهر جنيه.. حسب ظروفك.. ظروفك حلوه وابوك عمده ولاشيخ غفر ..برطع لوحدك في الاوضه..ظروفك زفت..هاتلك جوز مقاطيع زيك ..وبارك الله ف حلة العدس وكرتونة عيش القرقوش بتاع الوالده تحت السرير وبرطمان السمن الجاموس م البلد ونكله فجل روس من شارع رياض.. وسخان الكهربا ودمس …سرقه من ورا صاحب الملك والقرشانه مراته..
كل الطلبه..ف الشتا لابسين ..شيرز ازرق .. بلغة الايام دي بلوفر..مخروم عند كوعك..معني عدم وجود خرم عند الكوع.. ان الوالد شغال حرامي في الجمعيه الزراعيه..او العيله عواد باع ارضه..يللا نوجز. .. ونخش في الموضوع..
وهو عن تمسح بعض الناس الحقراء بالسلطه والارتماء تحت رجليها !!
المهم شقة تلات غرف ..في حي الحمرا الشديد الفقر ..يسكنها تلاته..حضرتي طالب تجاره..وطالب بهندسه من شمال قنا..وموظف من المنوفيه..خريج كليه حديث.. بالعلاقات العامه بالمحافظه ..شغلانته ..يقص صفحة الوفيات والمناسبات الاجتماعيه و يلزقهاويعرضها في فايل جميل صباح كل يوم علي الباشا المحافظ ..كان ايامها اللواء ممدوح سالم تقدس سره..
لما صاحبنا يسعده الحظ ..يحط ورد قدام المحافظ .. في الاحتفالات الجاهيريه..
لو البليه لعبت معاه يطلع في صوره وهو واقف زي اللطخ ورا الباشا..يومها الشقه متعرفش تنام الليل م الفرحه..ونسمع اغنية صوره ..صوره لعبدالحليم حافظ..طبعا حدث تاريخي..
في يوم ..يرجع م الشغل مكشر ..ليه .معالي المحافظ جه الصبح وشه مكشر ..لو المحافظ بطنه ماشيه عليه ودخل دورة الميه تلاقي صاحبنا جاله اسهال وبياخد انتوسيد…
بصفتي طالب بكلية تجاره فاضيين وصيع نسمع له..لكن المسكين بتاع هندسه قسم كهربا ومتفوق..مش فاضي لحكاوي ملة اهله..ارجوك ابعد عني مش فاضي لك..
لغاية يوم ..دخل الباشموظف علي زميلنا بتاع هندسه ..اوضته وحيحكي..الباشا المحافظ..وحيكمل والواد شخط فيه..كفايه ملعون ابوك لابو المحافظ لابو اللي يعرفه ابعد عني..انفعل المستوظف..تلعن ابو الباشا المحافظ..حاوريك..وحادبك ميري وملكي ..وقوم طارش الطالب بوكس ..كسر نضارته..وسحبه ع الارض..وبايديه ورجليه،.هات ياضرب م اللي يحبه قلبك ..تشتم ابوالباشا ياواطي يابن الكلب..انا مسامحك في لعنة ابويا لكن ابو الباشا..لا..لا..
نسيت اقولكم..الحي الراقي اللي احنا سكانه..كانوا احسن وارقي طبقه تسكنه كمسارية شركة اتوبيس الصعيد..حراميه بجداره..الحي يعمل حسابهم وكلهم بلدياتنا واولاد عمنا من محافظة قنا ..
لاجل الحظ ..احدهم كمساري سمع صرخة بلدياتنا المهندس..كما سمع الخليفه المعتصم صرخة المراه العربيه في عموريه تنادي وامعتصماه..فلبي النداء..ودخل الشقه..وبيده طبلوه تذاكر الاتوبيس..خشب طوله نص متر..ليس صغيرا ..كطبلوه كمسارية القاهره..وبدون تفاهم اخبط ..رزع المستوظف خبطتين ف الدماغ..خلي صالة الشقه دم وفزلين من شعر الجاني الاسوداللميع..وهات ياضرب..تضرب سيدك يافلاح ياكلب..كان ايامها الصعايده لهم قيمه وتمن..لوصعيدي اجوز واحده من بحري يتقال عليه علي سبيل المعايره ..جوز الفلاحه..وولاده.. عيال الفلاحه..وينظر اليهم نظره دونيه..قبل ان يحكمنا الفلاحين ويدلدلوا رجليهم..
نرجع لموضوعنا ..المهندس..قام وحرام عليكم ..كفايه..والمضروب طلع يجري ..ركب اول عربية كارو قابلته وع المستشفي تقرير وبعده قسم الشرطه ..
من بالليل اجتمع اللوبي القناوي بمحافظة اسيوط..اللي له صاحب بالقسم..اللي يعرف دكتور في المستشفي الاميري..
بعضهم له علاقه بابن محافظة قنا..المقدم عبدالمنعم عوض..مفتش المباحث العامه باسيوط..كان امن الدوله اسمها كده ايامها..كلموه قال ..كويس وضبتوه..ولالسه عاوز يستوي زياده ..ربنا يخليك ياواد العم..مخلينك للكبيره ..طيب خلي المهندس يروح المستشفي وانا موصيهم عليه..
صاحبنا الموظف واقف الصبح علي باب المحافظه..ياسيادة المحافظ ضربوني..مين انت ..دماغه ووشه ودراعه مربطوين بالشاش..اعمل لك ايه امشي من هنا ..روح القسم..
التقارير الطبيه وصايه ..الموظف اسبوع علاج..المهندس ٢١ يوم علاج..بلوكامين القسم الكمساريه بعتوا له اتنين كيلو لحمه من لحمة البداري اللي ترد الروح!!
في القسم..الطالب علي كرسي مستريح..الموظف ..اقف بعيد يامتهم من تاثير لحمة البداري..معاك شهود يامتهم ..مفيش ..طبعا احنا ذمتنا استك منه ..فيه..وكيل النيابه ..الطالب ..افراج من سراي النيابه..بتاع المحافظ..اربعة ايام ويراعي التجديد!!
طلع بعدهم القمل بيسرسب من مناخيره وعينيه .. الموضوع خلص !!
بعدها تسال الموظف ..اخبار الباشا المحافظ ايه. .يجري و.يقولك وانا مالي ..ملعون ابوه ابن كلب..مش بقولكم المتغطي بالحكومه عريان !!!