امْرَايَتْ لَبْغُو عَمْيَة …… زجل مغربي بقلم // عبد الجليل الفولاذي الآسفي // المغرب

امْرَايَتْ لَبْغُو عَمْيَة

عَفِّي يَا هَاذْ الْݣَارْحَة عَفِّي
رَاهْ سَفُّودْ لَبْغُو امْهَوَّلْ
اعْلِيكْ امْعَوَّلْ
زَانَدْ اعْوَافِي
يْحَتْحَتْ ضُرُّو
مَنُّو اتْقَدْرِي اتْغُرْفِي

رَخْفِي يَا ذِيكْ الدَّوَّاحَة رَخْفِي
رَاهْ الذَّاتْ مَسْلُوبَة تَنْطَقْ
بِرِيقْ نَاشَفْ ايْلَحَّقْ
خَلَّا طْوَيَّرْ ٱلْحَلْقْ
هَايَمْ مَنْ شُونُو ازْهَقْ
خَلَّاهْ خارَفْ
تَالَفْ
هَارَفْ
مَاهْ مَصَافِي
يْݣَدْ ايْكُونْ فِيَّا فِيكْ امْسَخْفِي

ݣَلَتْ مَا ݣَالُو عَفِّي
شَفْتْ مَا شَافُو كَفِّي
راَهْ امْرَايَتْ لَبْغُو عَمْيَة
ؤُاكْسَاهْ اخْنِيفْ رَاشِي
رَاهْ اكْبَايْلُو خَاطْيَة لَمْرَاسِي
مْحَرْدَّاهْ اسْنَانْ خُلْخَالْ امْفَرْݣَمْ حَافِي

نْݣُولْهَا بِعْقَلْ مَفْتُونْ
نْݣُولْهَا بِغَمْزَتْ اعْيُونْ
نْݣُولْهَا بِشُونْ مَغْبُونْ
حِيتْ زَحْمَتْ لْخَاطَرْ رَعْدَة
شَدَّاتْ الذَّاتْ شَدَّة
حِيتْ وَجْعَتْ لَدْخَالْ نَخْضَة
خَلَّاتْ اوْحَمْ الْمَنْجَلْ اعْمَا كَاشَحْ
خَلَّاتْ طَيْرِي يَاوِلِي اعْمَا
بِينْ الْمَطَّاتْ تَمَّة يَتْلَاوَحْ
نَوَّحْ يَا طَيْرِي
طَوْطَحْ
بَرَّحْ
نُوَّحْ بِضُرَّكْ لَمْشَلْوَحْ الْݣَادَحْ
بَرَّحْ بِجُرْحَة تْوَشْمَاتْ اهْنََا
ؤُ لَاخْرَة فِ لَݣْفَا مُوسْهَا وَافِي

هَآهْ يَا وِلِيْ يَايَمَّة
شَارَتْ دَوِيدْ طُعْمْ ݣُرْحَة
هَآهْ يَا وِلِي يَاحَنَّة
رَاهْ فَرْحَتْنَا بِلَوْجَعْ امْدَرْحَة
آشْ الدّاكْ يَا هَذَاكْ
عْلَ اعْقُودْ راشية اتْقَلَّبْ
آشْ الدَّانِي آشْ الدّاكْ
رَاهْ احْمَاقْ اهْوَاك اغْلَبْ
خَلَّا لَݣْلَبْ امْفَرْوَحْ لَصْوَابُو مْجَافِي