امْلُوكْ الرَّحْبَة ……… بقلم // عبد الجليل الفولاذي الآسفي // المغرب

1 امْلُوكْ الرَّحْبَة

بِاللهْ اعْلِيكْ يَا ذَاكْ لَمْسَافْرْ
لَرْجَالْ اللهْ عَافَرْ
فَوْسَخْ ارْيَاحَكْ يَسْخُنْ الطَّرْحْ
ؤُ خَلِّ ذَاكْ الزَّݣَّاي
لْعَاشَقْ اخْدِيمْ مُولْ ٱلْمَا يْوَنِّي
لَمْلُوكْ اسْمَا تَجْلَحْ
بْلَا مِجَالْ نَتَّخْطَفْ
نَشْعَلْ اشْمُوعْ
نَدْرَفْ ادْمُوعْ
امْخَالَفْ الْعَادَة
بِهَجْهُوجْ وُ اصْنُوجْ
سَـايَݣْ الٔـمَـرْفُودَة مَݣْـيُـودَة
لْسِيدِي مَحْرَزْ
تَتْرَاضْ الوَجْبَة فِشُونِي
لَشْوَاقِي تْهَزْ
تَحْمَ الدَّرْدْبَة رَكْبَة لْضُرِّي دَّزْ
يَتْبُورَشْ لَمْجَاجْ
وِ يَـتْبَـنَّـجْ تَبْنَاجْ
بِالسِّيفْ مَنِّي نَجْدَبْ إِلَا هَاجْ
ؤُ وَقْتْ النَّشْوَة
حَسْكِي طَرْفْ بِطَرْفْ مَنِّي
يْبَانْ الْحَضَّارْ عَسْرِي
رَاكَبْ اغْيَامْ كُويُو
بِبْخُورْ بَامْبَارَا
لِْفتُوحْ الرَّحْبَة يْدَنِّي

امْلُوكْ الرَّحْبَة 2

بِاللهْ اعْلِيكْ
يَا سَاكَنْ سِيدِي مَݣْدُولْ
افْحَلْ لَفْحُولْ
ݣُولْ
ؤُزِيدْ فِ لْݣُولْ
ݣُولْ
كِ ݣَالُو فِ لَغْنَا
لْحَالْ الْحَالْ يَاهَلْ الْحَالْ
ݣُولْهَا نُوبَة
ارْكِيلْ تِيلَادْ
ݣُولْهَا نُوبَة
تْزِيدْ ارْݣَادْ
ݣُولْهَا نُوبَة
بِسَنْتِيرْ وَݣَّادْ
يحْضَرْ سِيدِي مُوسَى
دْلِيلُو سْبِنِيَّة زَرْقَة
مَعْݣُودَة
تْـخَـلِّ نَݣْشَاتُو
مَعْدُودَة
اتْجِيبْـنِي خَشْبَة
مَمْدُودَا
حِيتْ دَلَّالِي جِيلَالِي
تْشَامِيرُو ابْيَضْ
يْخَلِّي لْݣَاشُوشْ ايْنِينْ
وَشْفَايْفِي تْغَنِّي