حالة ….بقلم محمود الطويل

من تحت عَقْب الباب
الصبح سرسب نوره يزرع
فرحَه للقلب الحزين
لمحِت عيونى الضى،
طافت ع الحيطان
شباك خشب
الشيش فَلَق ولا فيش قزاز
برواز لصورة ناس عُزاز
رفين كتب،
لوح اردواز
_ من ريحة الكُتَّاب زمان _
طرابيزه فى الركن البعيد
_ ب شاسِيه حديد _
كومة ورق،
واقلام رصاص فى برطمان
ع الأرض نُص كليم،
قديم
مقعد سليم
جوابات يا ” بيرم ” بالسداد
يا والد الشعراء ” فؤاد ”
يا ” ابو النجوم ”
آه يا ” النديم ”
لملمت طول جسمى اللى مش طايل سرير
متغطِّى بلحاف الضمير
وانتوا الدفا ليومى المطير
حريه للعصافير تطير
للضَى،
والأحلام بعيده