الذهب…..بقلم قصه قصيره بقلم عواد المخرازي

هو أنا ما أعرف شو اللي صاير بالناس؟! كل ما قعدت مع جماعه قال: في تحت بيتنا ذهب! تروح السوق عالقهوه بالشارع بالعمل هاجس الناس كله الذهب. وانا الله وكيلكم قاعد واضحك عليهم يعني معقولة احنا خمس سبع مليون أردني صرنا حافرين 50 مليون حفرة ذهب. يعني لو بدل كل حفره زرعنا شجره هسه عندنا 50 مليون شجرة وصارت بلدنا خضرا وحلوة ومنتجة. بقول معلش ممكن الناس تعبانه شوي.. تتسلى، عندها شويه يأس وأحباط. بصراحه انا اتفرج على الناس واضحك الغريب انه كل ما تقعد مع حدا يقول لك بالله خلي هالموضوع يضل _ سر بيننا_ احنا طالعين ندور ذهب وحاسبين حسابك إذا لقينا شي. تلقى كل جماعة جايبين معهم شيخ يحل الرصد ولما تسال الشيخ هو فعلا انت عمرك لقيت ذهب يقول لك كثير. طيب يا أخي أنا شايفك بدون سيارة وطفران ومش لاقي توكل. الغريب أنه حتى داخل المنازل كل حاكورة او حديقة تلقى عاملين لك 10 حفر بس للذهب ويا ريت زرعوا فيهم إشي. عجيب والله شو اللي صاير للناس ما اعرف.
المهم راحت الايام وأجت الأيام وفجأة خسرت شغلي وخسرت تجارتي والطفر أكلني أكل والجوع نهشني نهش. ما تركت مكان إلا دورت فيه شغل وما في فايدة من فتره وأنا ماشي بهالصحراء لقيت أشارة صليب طوله متر تقريبا محفور بالصخر. صورته وبعثتوا لحدا من الأصحاب قال: مش واحد بالمية مليون بالمية في هناك ذهب. هذه علامات ترصيد ذهب. أنا بيني وبينكم طرت من الفرح مش مصدق نفسي. معقول تفرج بعد كل هالعذاب. أه معقول انا طول عمري وأنا رضي مع أمي ومع الناس ربنا راح يكرمني. كثير قصص تشبه قصتي صارت مع ناس مثل ما أسمع. وأكرمهم ربنا.
تحولت فجأة لحدا ثاني حدا مغمور بالأمل كلي فرح ونشاط وتفاؤل … أخيرا فرجت ولقيت الذهب…
وأنا ماشي ما شعرت بنفسي وأنا أحلم بشو ممكن اعمل بالذهب. أول شي أجا ببالي اشوي خاروف طوله مترين وعرضه مترين عايزه مثل العجل البلدي بس خاروف نعيمي. راح انتقم من جارنا الكلب الحقير الي كل اسبوع يشوي هو وعياله لحمة بلدية تحت شقتنا .. عامل حرب علينا ودائما هو الي منتصر لأن بس توصل ريحة المشاوي نهرب انا وزوجتي بالأطفال برى الحارة ونرجع بس يخلصوا أكل وتختفي هالريحة. وفكرت كمان أجيب خمسين أزعر وأعمل موكب إلي مثل هالمسؤولين الكبار. نفسي أصير مسؤول مرة. وأمر على محل الحلويات واحجز كل الكنافة إلي موجودة واوزعها على الشحادين الي دائما قاعدين برى المحل الفاخر القذر. وفكرت امشي بالحارة وما أسلم على حدا وبدعس على كل ثري وغني فيها… وصلت البيت وحكيت لمرتي على الي صار وأنو أحنا خلص اغتنينا. بس خلي هالموضوع _سر بيننا_ ما بدي حدا يعرف.
صارت مرتي تترجاني اني اشيل هالفكرة من راسي ما رديت انا ورحت اشتريت فاس وعده الحفر. اسبوع وانا اطلع المغرب وارجع الفجر والله وكيلكم انهد حيلي عالفاضي اخر شيء مسكني صاحب الارض وراح مايسجني. رجعت البيت مكسور الخاطر مكتئب حالتي اسوء وألعن من قبل. بالليل شفت حلم غريب شفت: انه تحت شقة جارنا الي ساكنين عنده شوالات تبن والتبن تفسيره ذهب. صحيت مرتي من النوم وقلت خلص أحنا ندور بعيد وطلع الذهب تحتنا. المرأة صارت تترجاني اشيل هالافكار من راسي وتولول وتقول احنا وين نروح احنا بدون هالسالفه صاحب البيت راح يطردنا وين يروحوا الصغار. صاحب البيت والله ليطردنا هو احنا قادرين ندفع له الايجار حتى نروح نحفر تحت بيته انا ما سمعت كلامها. وصرت أخطط كيف اطلعهم من البيت واحفر تحت غرفه النوم اجي عبالي 100 فكره وخطة. واحدة من الخطط قررت إني احط الهم مخدر بخزان المي لكل العيله قلت يصحوا الصبح أكون طلعت الذهب وسافرت برا البلد. ومرات قلت اساوي مشكله مع حدا منهم واسجنهم. وافكار الله وكيلكم شيطانيه ما اقدر احكيلكم عنها. وانا افكر واخطط المراه قالت أسألك بالله يا زلمة تفكك من هالافكار وتفكك من هالذهب انت عارف انه كله هذا وهم. فكر شوي بولادنا وين نروح احنا وين يروحوا الصغار وين نلقى لهم مدارس قريبه من الشقه المهم : سرحت بخيالي وبالكاد اسمع صوت مرتي.
صراحه اقول الناس ما تلتام يعني معقوله اذا انت فكرت تشتغل تبيع خضره بالشارع يصادروا رزقك اذا اشتريت سياره وحاولت تشتغل عليها بالاجره تجيك مخالفات 100 و200 دينار اذا لفيت البلد كله تدور على شغل وبوظيفه ما راح يعطوك الا نص اجر مرتب لانه عندنا 5 مليون وافد واجنبي وبلدنا كلها ما تيجي 7,000,000 وبلد فقيره ما فيها لا مي ولا صناعة ولا هذيك المصالح. يعني الناس ما الومهم لما تصير تفكر بالذهب وتفكر بالمستحيل. كل يوم نسمع بولد انتحر كل يوم نسمع بنت انتحرت كل يوم شب أحرق نفسه. كل يوم نسمع بشباب يموتوا على الحدود يشيلوا مخدرات ينتحروا عشان يقدروا يعيشوا. طب وين تروح الناس لا احنا قادرين نسافر ولا احنا قادرين نشتغل بلدنا وممنوع تشتغل اي شيء. طب شو المطلوب يا رئيس الوزراء منا عشان نقدر نعيش بكرامة؟ المطلوب منا اشي واحد انك ترضى بالمرتب تبعك. طيب المرتب ما يكفيني وين اروح انا شو لازم اعمل الجواب: لازم تسكر ثمك وممنوع تفتحه وتاكل تبن اذا ما عجبك. عرفتوا ليش الناس بكل بلدنا بعد كل هالياس والاحباط والقهر بتدور على اشي مستحيل اسمه الذهب؛ اسمه الوهم. اليأس والاحباط يخلي الناس تعمل اكثر من هيك.
بصراحه انا ما ألومهم بس اذكر من عشر سنين الحج نتنياهو نشر مقال. وانا قراته قال راح اخلي العرب يتمنوا انه تحكمهم اسرائيل انا قرات الخطاب بس ما توقعت انه يحصل هالشي بهالسرعة يعني لو سألت اي مواطن عربي بكل الدول العربيه تتمنى تحكمك دوله اسرائيل راح يقول لك موافقين بشرط ما يقربوا من القدس وما يقربوا من الابرياء.
لأنه الشيء اللي قاعد يصير ببلدنا ما يدخل العقل و ما يحده منطق.
بس نفسي أسأل السيد نتنياهو عايز اعرف شيء واحد: كيف قدرت تعمل كل هالاشياء هاي ونتمنى دولتك تحكمنا.
كيف؟
كيف؟
كيف؟
اسمع صوت زوجتي وهي تولول وتترجاني هي تعرف المخططات الشريره اللي براسي المخططات الشيطانيه. تصيح يا زلمه أسألك بالله أسألك بالله اتركهم اتركك من هالافكار خلينا نقدر نربي هالصغار وكأن صوتها يأتي على بعد ألف ميل.وبالكاد اسمعها وهي بجانبي. عقلي كله بالحال التي وصلت إليها بلدنا وشبابنا وحالنا. كيف صرنا و كيف صارت بلدنا كلها عصابات ومافيات وفساد وقذارة وظلم وجوع كيف صرنا هيك كيف؟ انا متاكد انه بعد الحال إلي وصلنا إله كل الشعوب هاي مستعده الآن تبصم لليهود تعالوا. …..
ذهبت باتجاة النافذة ونظرت الى جاري صاحب الشواء. كانت المناقل ممددة امام منزلة كحواري بحر. فقلت: الا هذا هذا لن يقبل بنتنياهو لان السيد نتنياهو في دولته لا يقبل ان يكون هناك جائع وشبعان معا في بلد واحد.