خالد صالح يكتب :هو انت متخيل يا مؤمن ان البرلمان ممكن اصلا يرفض اي قانون مقدماه الحكومة؟

= هو انت متخيل يا مؤمن ان البرلمان ممكن اصلا يرفض اي قانون مقدماه الحكومة؟ ده مجلس النواب (كان مجلس الشعب) .. يعني دول نواب الحكومة .. محدش منهم يقدر يرفع عينه في اللى جايبينه بل يؤدي دوره وهو ساكت ليفتحوا ملفاته.
= اوعى تفتكر ان الحكومة قلبها رق لحال الملاك فعملت قانون الايجار القديم .. كل القصة ان عينها على عمارات وسط البلد وعاوزة تفضيها عشان مشروع العبار (الاماراتي كواجهة لابناء العم) .. وبالمرة تاخدلها كام مليار ضريبة تصرفات عقارية للوحدات اللى حتتباع في كل الجمهورية بعد ما تتفضى. وتبيع للمستإجرين القدامى شوية الشقق اللى بنتها الحكومة وراكده لارتفاع سعرها.
= اوعي خيالك يصور لك ان عندنا ثلاث سلطات .. تشريعية وتنفيذية وقضائية (مش عاوزك تشطح اوى وتتصور ان عندنا سلطة رابعة اسمها الصحافة الحرة). لا احنا معندناش غير سلطة واحدة بس هي الرئيس.
= قبل ما تقولي لا احنا عندنا انتخابات وديموقراطية ومهلبية .. احب اعرفك ان حتى انتخابات العمداء ورؤساء الجامعات وعمد القرى اتلغت وكله بقى بالتعيين .. يا مؤمن ده احنا معملناش حتى انتخابات محليات اصلا من ١٧ سنة .. اه تخيل ان اخر انتخابات مجالس محلية كانت في ٢٠٠٨ !!!!!