صحفي مجهول …..بقلم سيد الخمار
مات مات
لأعاش
مين قال مات؟
أنتوا الأموات؟
وعندي ألف دليل .
وحتفضل يا أصيل
بنوره ف عتمة ليل
وشموس الحق المغدور
علي مذبح دسك الكلمة في صالة التحرير
شفع له قلبه الطاهر
فتح له باب السموات
مين قال مات أنتوا الأموات
شوف الضحكة بترسم كفن الحرية
براح رباني طريق لله
وهناك لاحيشكي وجيعة قلبه
ولا حد يراقبه يسرق قوته الغلبان
لا حيحتاج يكتب
ولا يشطب حرف القهر
ولايعتب على ناس تركوه
مرمي في زنزانه حزنه
يعافر حتي الشهقه الأولى
سلم علي كل الأحباب ياجورنالجي
عندك بيرم
إتساهر وياه
والعقاد تلقاه
قاعد ف صالون الطهطاوي
إمسح دمعك
إتوضي ف نهر الجنه الصابح
لا تستني لا بكره ولا إمبارح
سامح عجز ورق الدشت
وزميل عايش بالسحت
ربك عالم إنك توبت
لحظة ما رجيت المولي
تموت مستور بالعزه
سيبك م العره
جورنالجي قله
خليها ع الله
رجعت زي ماجيت
توبك ناصع
عرضك ساطع
شرفك فارع
ضلل عناقيد ش عبد الخالق ثروت
ونقابة صحفيين واقفين بدموع
غطت صفحات الجرانين
عزاك منصوب ياصاحبي
الصحفي
ف عيون الصحبه
لغاية يوم الوعده
الله ياسلام ع الموته
لخصت الحدوته
غني ياعم براحتك ف الفردوس الأعلي
مع كل الأطهار أولاد البطة السودة
يارب إستودعناك عبد مطيع لله وحده
فتشفع له بكل دعاء طيب مدد ياكريم .
