السفير فوزي العشماوي يكتب :هل يسعي ترمب بتصريحه لصفقة متعددة الجوانب تشمل غزة والتهجير والسد
الحقيقة عجبني رد الرئيس السيسي علي كلام ترمب عن سد النهضة، وعجبني إن الرئيس هو اللي رد بنفسه من خلال تويتة أشاد فيها بجهود ترمب لحل قضايا المنطقة ومنها غزة وسد النهضة ..
ترمب بيلعب ويناور، وبيطرح بدون مناسبة موضوع السد في وقت ماالكل مهتم بمأساة غزة، فالريس علي طول لقط الخيط وقاله عاوز تحل إتفضل إيدينا علي كتفك وهتاخد نوبل كمان ..
هل يسعي ترمب بتصريحه لصفقة متعددة الجوانب تشمل غزة والتهجير والسد ويمكن حتي كمان التطبيع الابراهيمي ؟ ممكن جدا ووارد، لأن فشل ترمب الواضح هو ونيتنياهو في تحقيق أي أهداف جوهرية لهم الاتنين : استرداد الاسري، تدمير حماس، التهجير، التطبيع وبالذات مع السعودية .. ممكن جدا يخليهم يوسعوا الصفقة لعلها تكون أكثر جاذبية، وطبعا صعب نيتنياهو يتكلم عن السد فالمعلم الكبير هو اللي يتصدي للموضوع ..
الريس بيتعامل بهدوء في موضوع وظروف بالغة الدقة والحرج، أكيد مصر مش عاوزة تستعدي شريك استراتيجي بقوة وبطش أمريكا وتحكمها في المؤسسات الاقتصادية وخصوصا لو اللي بيحكمها حد غير متوقع زي ترمب ..
ومصر مش عاوزة اي تهجير بدون ماتوصل لخناقة مكشوفة مع امريكا او صدام مع اسرائيل
ومصر مش متأثرة سلبا والحمد لله ( حتي الان ) ببناء السد بعد ان اكتمل الملء في سنوات فيضان اعلي من المتوسط، وبالتالي مائيا صوابعنا مش تحت اسنان حد برغم عدم توصلنا لاتفاق نهائي مع أثيوبيا حتي الان
فلما ترمب يتكلم عن حقنا في مياه النهر وخطأ بلاده في تمويل السد ورغبته في التوصل لاتفاق نهائي عادل فلازم يكون الرد أهلا وسهلا اتفضل .. وقالوا الجمل طلع النخلة .. آدي الجمل وآدي النخلة !
