أسوأ ما في الانسان….بقلم محمود يونس

أسوأ ما في الانسان
يبان
وهو ماشي ف سكته
سوء نيته
أنانيته
وحاجات غريبة
ممكن تغير خلقته
طمعه إللى زاد
عن الحدود
حبه وميله للخلود
مع ان فوق الارض دود
زي ما تحت الأرض دود
نظرة عينه لما تحسد
وانه مايحبش يشوف

فضل ربه عند حد
وانه دائماً يستلف
بس مش ممكن يسد
أسوأ ما في الانسان
لسان
سابق بيانه
أسوأ ما في الإنسان جنانه
واتزانه
إليّ بيضيع بس لما
حد يلعب له في ودانه
أسوأ ما في الانسان
زمان
هو نفسه
أسوأ مافيه النهارده
بيحب ورده
بس يقطفها بأديه
ولما تدبل
ولا يزهق من جمالها

فجاءه تزهدها عنيه
وياريته كان سابها ف حالها
أسوأ ما في الانسان
شعور بالاضطهاد
والعناد
إليّ بيسيطر عليه
أسوأ ما في الانسان
جوا افعاله تلاقيه
أسوأ ما في الانسان
شعوره انه طيب قوى
وان كل الناس عليه
والغريبة
ان محدش يوم سلم
من لسانه ومن اديه
أسوأ ما في الانسان
يبان

لما يغضب
واللي كان طيب مؤدب
فجأة يتحول شيطان