انس دنقل يكتب :الكورة وابن صاحب الكورة !!
دخول البرلمان في دول الفرنجة وفي بلادنا قديما (احيانا) له قواعد وشروط لابد من توفرها !!
( للذكري هل تعلم ياصديقي : منذ مايقارب المائة عام تقريبا عندما كانت بلادنا.. بلاد ورجال ايضا ..
يحيي باشا ابراهيم رئيس وزراء مصر ووزير داخليتها ..المشرف علي انتخابات اعتقد 1927 ..سقط امام احد شباب حزب الوفد في محافظة الشرقية..ليظل هذا السقوط وسام شرف علي صدر هذا الرجل الراحل العظيم رحمه الله !! )
الانتخابات ياصديقي زي مباريات كرة القدم ..هناك حدود قانونية ومواصفات للملعب.. الكرة ..الحكم..قوانين اللعبة..اعداد اللعيبة.. وقت المباراه..البدلاء ..الانذارات ..حالات طرد المخالفين .. هذا بين الأندية المحترمة..
لكن لعبة كرة القدم في الشوارع لاتحكمها أية معايير مماتقدم :
اي مكان فاضي..اي مساحة.. جنب إي خرابة في الشارع..حتي لو في قزاز مكسر بالملعب يعور اللعيبة .. اي اعداد لعيبة..الحكم : اي عيل صايع او حمار اوبغل ..لاتوجد اي فواصل بين اللعيبة والجمهور..ممكن الجمهور ينزل الملعب ويشارك او يكسر عضم اللعيبة !
المشكلة الكبري التي كانت تواجه الجميع في هذه اللعبة..هي ابن صاحب الكورة..الكل يجب ان يخضع لرغباته..حتي لوكان اهبل او غشيم .. يعز من يشاء ويذل من يشاء بيده الأمر..نفضي له الجون يسجل اي اهداف يرغب في احرازها والا اتقمص وامتنع عن اللعب واخد الكورة معاه البيت وروح والناس زي ماانت عارف غلابة مكسورين الجناح علي فيض الكريم..زمارة تلمهم كرباج يفرقهم !!
ف يااخوانا محدش يزعل المحروس.. ده دلوعة امه ..قاعد علي حجرها..لو لعن سنسفيل اللي خلفوك اعمل ودن من طين والتانيه من عجين..سد ودانك وماتسمعش..احنا غلابة عايزين نكمل الماتش..الا لو كان معاك كورة احتياطي ومفيش..اسمع الكلام ..خلي الليلة تعدي علي خير !!
الكلام ده كله بس بالنسبة لابن صاحب الكورة فتخيل الماتش لما يكون اللعيب ابن صاحب الملعب والاستاد والحكم والمذيع ولجنة التحكيم واستديوهات التحليل الكروي في التليفزيون الذي ولد عملاقا بتاع احمد موسي والديهي مجتمعين !!
ياصديقي احمد ربك ان سمحوا لك شهر كامل تكتب اسمك بالبنط العريض علي حوش البهايم بتاعكم وتلف علي المنادر وتنشر صورك ع الفيس باعتبارك مرشح الغلابه وتبوس في الغلابة !!
اخيرا بوس ايدك مقلوبة ومعدولة..حلو.. اهو خليناك تتسلي وتحلم وط..ك لامؤاخذه مكشوفه !!
