وكأني….بقلم عصام عبد المحسن

وكأني
أول مره بشوف الموت
وهو بياخدك مني
وبحس وجودك
مش بارح عني ثواني
رغم بعادك
يمكن…
الموت جوايا معشش
لكن …
خايف يكشف سره
و يبوح بغيابك
لأقبض روحه بايدي
أو يقبض روحي
ف ألقاكي
وإنتي كالعادة
نايمه ف وش الباب
مستنيه رجوعي
علشان ما أطمن روحك
فتغادريني
و بهزة رأسك
ترسمي خط الوصل
ما بين السماء والأرض
تضحك لي ملامح وشك
تقولي لي :
بكل وضوح الصوت
– خلاص يا عصام
وتسيبي إيدي
تسقط منك
فيموت الكون
قدام عيني.